ءىىم "قايرات" - "رەال" ماچىندەگى الىپساتارلار داۋىنا قاتىستى تۇسىنىكتەمە بەردى، - دەپ حابارلايدى اqshamnews.kz. ءتىلشىسى Tengri Life-قا سىلتەپ.
الماتىدا 30 قىركۇيەكتە وتكەن فۋتبولدان ۋەفا چەمپيوندار ليگاسىنىڭ "قايرات" پەن مادريدتىك "رەال" اراسىنداعى ويىنىنان كەيىن الەۋمەتتىك جەلىلەردە قىزۋ تالقىلاۋ ءوربىدى. جەلى قولدانۋشىلارى تانىمال قازاقستاندىق انشىلەر نۇرلان ەسپانوۆ پەن ساكەن مايعازييەۆتىڭ ۇلدارىن بيلەت سپەكۋلياسياسىنا قاتىسى بار دەپ ايىپتادى.
جەلىدە تاراعان حابارلامالارعا سايكەس، نۇرلان ەسپانوۆتىڭ ۇلى ماچ بيلەتتەرىن 500-600 مىڭ تەڭگەدەن ساتقان-مىس. كەيىن ساكەن مايعازييەۆتىڭ ۇلى دا وسىنداي حابارلاندىرۋ جاريالاپ، بيلەتتەردى 350 مىڭ تەڭگەدەن ۇسىنعانى جايلى اقپارات شىقتى.
بۇل جايت قوعامدا رەزونانس تۋدىرىپ، بيلەتتەردىڭ قولجەتىمدىلىگى مەن ادال ساتىلىمىنا قاتىستى سۇراقتار كوبەيدى.
ءىىم: تەكسەرۋ ءۇشىن رەسمي شاعىم قاجەت
ءماجىلىس كۋلۋارىندا جۋرناليستەر ىشكى ىستەر ءمينيسترىنىڭ ورىنباسارى سانجار ءادىلوۆتان وسى ماسەلەگە بايلانىستى تۇسىنىكتەمە سۇرادى.
"مەن بۇل اقپاراتتى سىزدەردەن ەستىپ تۇرمىن. ەگەر رەسمي ءوتىنىش تۇسسە، ءبىز مىندەتتى تۇردە تەكسەرۋ جۇرگىزەمىز. قاجەتتى پروسەسسۋالدىق شەشىم قابىلدانادى"، - دەدى ءادىلوۆ.
ول سونىمەن بىرگە الەۋمەتتىك جەلىلەردەگى شاعىمداردى كورمەگەنىن، ءبىراق ازاماتتاردان رەسمي تۇردە ءوتىنىش تۇسكەن جاعدايدا قۇقىق قورعاۋ ورگاندارى "مىندەتتى تۇردە تەكسەرۋ شارالارىن جۇرگىزۋگە دايىن" ەكەنىن ايتتى.