كونستيتۋسيا ءبىزدىڭ اماندىعىمىزدىڭ ىرگەتاسىن قۇرايدى.
ەلدىڭ ءار ازاماتى ەلدىڭ نەگىزگى زاڭىن ءبىلۋى جانە قۇرمەتتەۋى، وقۋى كەرەك دەيدى زاڭ عىلىمدارىنىڭ دوكتورى، پروفەسسور الاۋ يبرايەۆا. پروفەسسور بۇل پىكىرىمەن Almaty-akshamy.kz تىلشىسىمەن سۇحباتتاسۋى بارىسىندا ءبولىستى، دەپ حابارلايدى Almaty-akshamy.kz.
بۇگىن قازاقستان كونستيتۋسيا كۇنىن اتاپ وتۋدە. ءبىز ءۇشىن كونستيتۋسيانىڭ ماڭىزى قانداي دەگەن سۇراقتار توڭىرەگىندە پروفەسسور الۋا يبرايەۆا ايتىپ بەردى.
«بۇل ەلىمىزدىڭ نەگىزگى زاڭى. ءبىز بەيبىت قوعامدا ءومىر ءسۇرىپ جاتىرمىز، ماماندىق تاڭداي الامىز، ءوز قۇقىقتارىمىز بەن ەركىندىگىمىزدى جۇزەگە اسىرىپ، ءوز بولاشاعىمىزعا سەنىممەن قاراي الامىز. ءبىزدىڭ كونستيتۋسيامىزدىڭ ءمانى مىنادا، مۇندا ماڭىزدى پرينسيپتەر، يدەيالار، ەرەجەلەر بەكىتىلگەن، ولاردىڭ نەگىزىندە ادامدار اراسىنداعى قاتىناستار قۇرىلادى، قوعام داميدى، مەملەكەت جۇمىس ىستەيدى»، - دەيدى ا.يبرايەۆا.
ءبىزدىڭ كونستيتۋسيامىز قازاقستاندى بەيبىت مەملەكەت دەپ جاريالايتىنىن، مۇندا ءتۇرلى ۇلتتار مەن حالىقتار بەيبىتشىلىك پەن كەلىسىمدە ءومىر سۇرەتىنىن ايتتى ول.
كونستيتۋسيانىڭ كىرىسپەسىنە نازار اۋدارساق، «بiز، ورتاق تاريحي تاعدىر بiرiكتiرگەن قازاقستان حالقى، بايىرعى قازاق جەرiندە مەملەكەتتiلiك قۇرا وتىرىپ، ءوزiمiزدi ەركiندiك، تەڭدiك جانە تاتۋلىق مۇراتتارىنا بەرiلگەن بەيبiتشiل ازاماتتىق قوعام دەپ ۇعىنا وتىرىپ، دۇنيەجۇزiلiك قوعامداستىقتا لايىقتى ورىن الۋدى تىلەي وتىرىپ، قازىرگى جانە بولاشاق ۇرپاقتار الدىنداعى جوعارى جاۋاپكەرشىلىگىمىزدى سەزىنە وتىرىپ، ءوزىمىزدىڭ ەگەمەندىك قۇقىعىمىزدى نەگىزگە الا وتىرىپ وسى كونستيتۋسيانى قابىلدايمىز»، - دەلىنگەن.
«نەگىزگى زاڭ بۇكىلحالىقتىق رەفەرەندۋمدا قابىلداندى. بۇل قازاقستان ازاماتتارىنىڭ باسىم كوپشىلىگى وسى زاڭعا داۋىس بەرگەنىن، وسىندا بەكىتىلگەن بارلىق يدەيالاردى قولدايتىنىن بىلدىرەدى. ءبىزدىڭ كونستيتۋسيادا نەگىزگى دەموكراتيالىق يدەيالار بەكىتىلگەن. بۇل دەموكراتيا، پرەزيدەنتتىك باسقارۋ فورماسى، تەڭ دارەجەدە مەملەكەتتىك جانە جەكە مەنشىكتى تانۋ. ەلىمىزدەگى مەملەكەتتىك ءتىل-قازاق ءتىلى. سونىمەن بىرگە كونستيتۋسيادا بيلىك ورگاندارى مەن مەملەكەتتىك ۇيىمداردا ورىس ءتىلىن پايدالانۋعا رەسمي تۇردە رۇقسات ەتىلگەن»، - دەپ اتادى الۋا يبرايەۆا.
پروفەسسوردىڭ ايتۋىنشا، كونستيتۋسيا – بۇل قاتىپ قالعان اكت ەمەس. ۋاقىت وزگەرەدى جانە بۇل وزگەرىستەر كونستيتۋسيالىق نورمالاردا كورىنىس تابادى. ق ر قولدانىستاعى كونستيتۋسياسىنا وزگەرىستەر مەن تولىقتىرۋلار 1998، 2007، 2011، 2017، 2019 جىلدارى ەنگىزىلدى.
«كونستيتۋسياعا تۇزەتۋلەر قابىلداعان كەزدە نە وزگەرىسسىز قالۋى كەرەك دەگەن سۇراققا جۇگىنەيىك؟ مۇندا وزگەرىستەرگە ۇشىرامايتىن نورمالار بار، ويتكەنى بۇل ەرەجەلەر جالپى قوعامنىڭ مۇددەلەرىنە تولىق سايكەس كەلەدى. بۇل مەملەكەتتىڭ پروگرەسسيۆتى دامۋعا ۇمتىلۋىنا، مەملەكەتىمىزدىڭ بەيبىتشىل سيپاتى تۋرالى ەرەجەسىنە،ۇلتارالىق كەلىسىم مەن كونفەسسياارالىق قاتىناستار تۋرالى ەرەجەگە، ادام قۇقىقتارىنا قاتىستى نورمالارعا جانە ت. ب. قاتىستى نورمالار. سونىمەن بىرگە، جوعارى بيلىك پەن باسقارۋدىڭ قالىپتاسۋى مەن قىزمەتىنە قاتىستى نورمالارعا وزگەرىستەر مەن تولىقتىرۋلار ەنگىزىلۋى مۇمكىن»، - دەگەن پىكىرىمەن ءبولىستى زاڭ عىلىمدارىنىڭ دوكتورى.
وسىلايشا، ول قازىرگى ۋاقىتتا ءبىزدىڭ مەملەكەتىمىزدىڭ دامۋىنىڭ نەگىزىن ەلدىڭ باس زاڭىنا ەنگىزىلگەن يدەيالار مەن ەرەجەلەر قۇرايتىنىن العا تارتتى.
«كونستيتۋسيا ءبىزدىڭ اماندىعىمىزدىڭ ىرگەتاسىن قۇرايدى. قورىتىندىلاي كەلە، ەلدىڭ ءار ازاماتى ەلدىڭ نەگىزگى زاڭىن ءبىلۋى جانە قۇرمەتتەۋى، وقۋى كەرەك دەپ ايتقىم كەلەدى. بۇل مەرەكە ءار ادام ءۇشىن ماڭىزدى»، - دەپ قورىتىندىلادى يبرايەۆا.