ەلوردادا پرەزيدەنتتىك «التىن ساپا» جەڭىمپازدارىن ماراپاتتاۋدىڭ XV مەرەيتويلىق سالتاناتى ءوتتى
وعان مەملەكەت باسشىسى قاسىم-جومارت توقايەۆ قاتىسىپ، 10 جىل ىشىندە وڭدەۋ ونەركاسىبىنىڭ ەكونوميكاداعى ەنشىسى تاۋ-كەن سالاسىنىڭ كورسەتكىشىنەن اسىپ، 13%-عا جەتكەنىن ەرەكشە اتاپ ءوتتى، دەپ حابارلايدى Almaty-akshamy.kz
«بيىلعى سالتاناتتى جيىن تاۋەلسىزدىكتىڭ 30 جىلدىق مەرەيتويىمەن تۇسپا-تۇس كەلىپ وتىر. مۇنىڭ زور سيمۆولدىق ءمانى بار. ەگەمەندىك كەزەڭىندە قازاقستاندا بيزنەستىڭ دامۋىنا جان-جاقتى جاعداي جاسالدى. سونىڭ ناتيجەسىندە جاڭا زامانعا ساي كاسىپكەرلەر شوعىرى قالىپتاستى. ولار ۇلتتىق ەكونوميكانىڭ باستى قوزعاۋشى كۇشىنە اينالۋدا»، - دەدى پرەزيدەنت.
«التىن ساپا» كونكۋرسىنا قاتىسۋعا الماتى قالاسىنان 33 كومپانيا ءوتىنىش بەرگەن بولاتىن. ونىڭ ىشىندە 19 كاسىپورىن قۇجاتتاردىڭ تولىق توپتاماسىن ۇسىنعان جانە كونكۋرستىڭ كەلەسى كەزەڭىنە جىبەرىلگەن.
بيىل الماتى قالاسىنىڭ 8 كومپانياسى «التىن ساپا» سىيلىعىنىڭ جۇلدەگەرى اتاندى. اتاپ ايتساق، «وندىرىستىك باعىتتاعى ۇزدىك كاسىپورىن» نوميناسياسى لاۋرەاتتارىنىڭ ءبىرى – الماتى يندۋستريالدى ايماعىندا ورنالاسقان «DOC Co.LTD» ج ش س، ال «قىزمەت كورسەتەتىن ۇزدىك كاسىپورىننىڭ» ءبىرى – «ينۆيترو-كازاحستان» ج ش س. سونداي-اق، ەكى الماتىلىق كاسىپورىن «ىسكەر» سىيلىعىن جەڭىپ الدى. بۇل جۇلدە ق ر پرەزيدەنتىنىڭ «التىن ساپا» جۇلدەسى ءۇشىن كونكۋرسقا جانە «قازاقستاننىڭ ۇزدىك تاۋارى» رەسپۋبليكالىق بايقاۋ-كورمەسىنە قاتىسۋشى كومپانيالاردىڭ اراسىنان بەرىلەدى. شاعىن كاسىپكەرلىك سۋبەكتىلەرىنىڭ اراسىنداعى جەڭىمپازداردىڭ ءبىرى – «ەلەنا» تىگىن ءوندىرىسى» ج ش س، ال ءىرى كاسىپكەرلىك سۋبەكتىلەرىنىڭ ىشىنەن «كازفەرروستال» ج ش س سۋىرىلىپ العا شىقتى.
«ۇزدىك الەۋمەتتىك جاۋاپكەرشىلىكتى كاسىپورىن» نوميناسياسىندا «KAZ MINERALS AKTOGAY» ج ش س، «ەكولوگياعا قوسقان ۇلەسى ءۇشىن» نوميناسياسىندا «Alina group» ج ش س «پارىز» سىيلىعىنىڭ كۇمىس مۇسىنشەسىن جەڭىپ الدى.
مەملەكەت باسشىسى وتاندىق كومپانيالاردىڭ باسەكەگە قابىلەتتىلىگىن جانە ونىمدىلىگىن ارتتىرۋ ءۇشىن ساپانىڭ زاماناۋي جۇيەلەرىن ەنگىزۋ قاجەتتىگىن اتاپ ءوتتى. سونداي-اق، حالىقارالىق ۇزدىك ۇلگىلەرگە جانە تاجىريبەلەرگە سايكەس بولۋى ءۇشىن «التىن ساپا» تالاپتارىن كەزەڭ-كەزەڭمەن ساپانى باسقارۋدىڭ ەۋروپالىق ستاندارتىنىڭ جاڭا ۇلگىسىنە سايكەستەندىرۋدى ۇسىندى.