وقۋشىلار سارايىندا باس قوسقان وقۋشىلاردىڭ قاراسى قالىڭ. ولار بۇل كۇنى ءوز قولدارىمەن جاساعان اسەم بۇيىمدارىن كوپشىلىك تالقىسىنا سالىپ، ب ا ق سىناپ جاتىر. «التىن قازىنا» اتتى قالالىق كوركەم جانە ساندىك-قولدانبالى ونەر بويىنشا بالالار شىعارماشىلىعىنىڭ كورمە-بايقاۋىنا قاتىسقان جۇمىستاردى ءادىلقازىلار 7 نوميناسيا بويىنشا باعالادى. جۇزدەن جۇيرىكتەر ارنايى ديپلومدارمەن ماراپاتتالدى.
كورمە زالىنان ورىن العان جۇمىستار بىرىنەن-بىرى وتەدى. ونىڭ ۇزدىگىن تاڭداۋ قازىلارعا دا وڭايعا تۇسپەگەن سىڭايلى. ويتكەنى، بالانىڭ قيالى وتە جۇيرىك. استە، ونىڭ الەمىنە بويلاۋ دا وڭاي ەمەس. ماسەلەن، ءبىر عانا بوياۋمەن بۇكىل ويىن جەتكىزگەن، قاراپايىم جىپپەن تاقىرىپتى اشىپ كورسەتكەن جۇمىستار بار. اسىرەسە، اعاشتان ءتۇيىن تۇيگەن، تەمىردى قامىرشا يلەگەن شەبەر بالالاردىڭ قادامى قاتتى قۋانتىپ وتىر. ارينە، ولار كەلەشەكتە وسى جولدى تاڭداپ جاتسا، كوركەم ونەر سالاسىنىڭ بولاشاعى جارقىن بولارى ءسوزسىز. تاعى ءبىر قۋانارلىعى- ولاردىڭ شىعارمالارىنداعى ۇلتتىق بوياۋدىڭ قانىقتىعى بولدى. بالالار ءوز شىعارمالارى ارقىلى ۇلتتىق قۇندىلىقتى بارىنشا دارىپتەگەنى بايقالادى. كەز-كەلگەن شىعارماعا زەر سالساڭىز، وندا بەزبەندەلگەن ەل تاريحىن بايقايسىز. تۋىندىعا ەلىمىزدىڭ وتكەنى مەن بۇگىنى ارقاۋ بولعان. سونىمەن، «اعاشتى، سۇيەكتى، تەرىنى كوركەمدەپ وڭدەۋ:» -المابەك جانىبەك، «مەتاللدى كوركەمدەپ وڭدەۋ» ماليكا حافيز، «اعاشتان، تاستان، سازدان (قىش ساز)، سابان، توقىمادان شاعىن فورماداعى مۇسىندەر جاساۋ» اباي ەلجان، «توقىما بۇيىمدارىن دايىنداۋ» اراي ەركىن ، «قاعازدان بۇيىمدار جاساۋ» ايدانا قانايبەك، «ۇلتتىق ويۋ-ورنەگى بار حالىقتىق كيىمدەرىنىڭ ۇلگىسىن جاساۋ» ءماريام داتقايەۆا، «ۇلتتىق ناقىشتاعى ينتەرەردىڭ ەرەكشە ديزاين جوباسى:» ءاليحان ءانۋار ۇلى 7 اتالىم بويىنشا 1 ورىن يەگەرى اتانىپ، جەڭىمپاز دەپ تانىلدى.
تاقىرىپقا وراي:
ءمادينا مۇراتبەك قىزى، وقۋشىلار سارايىنىڭ كوركەم ونەر ءبولىمىنىڭ جەتەكشىسى
- كورمە-بايقاۋدىڭ «التىن قازىنا» اتالۋى دا تەگىن ەمەس. جالپى، بۇل بايقاۋ ۇردىسكە اينالىپ، تۇراقتى ءوتىپ كەلەدى. وسىناۋ بايقاۋ بارىسىندا قانشاما تالانتتى بالانىڭ ەسىمى بەلگىلى بولدى. بايقاۋعا قاتىسىپ، باعىن سىناعاندار قانشاما! ماسەلەن، بيىل 7 اتالىم بويىنشا 230 جۇمىس كەلىپ ءتۇستى. وقۋشىلار سارايىنىڭ كورمە زالىندا جەڭىمپازدار ەسىمى انىقتالدى. ءساتىن سالسا، 1 ورىن يەگەرلەرى ماماىر ايىندا استانادا قاشىقتان وتەتىن رەسپۋبليكالىق كەزەڭگە قاتىساتىن بولادى.
