سوت ءۇش ۋچاسكەلىك پوليسيا ينسپەكتورىن 3 جىلعا باس بوستاندىعى شەكتەۋ تۋرالى ۇكىم شىعاردى
«التىن وردا» بازارىندا ساۋداگەرلەردەن زاڭسىز اقشا جيناعان پوليسەيلەر سوتتالدى، دەپ حابارلايدى Almaty-akshamy.kz Azattyq Rýhy-نا سىلتەمە جاساپ.
ق ر سىبايلاس جەمقورلىققا قارسى ءىس-قيمىل اگەنتتىگى الماتى وبلىسى بويىنشا دەپارتامەنتىنىڭ باسشىسى سەرىك ورىمبەتوۆتىڭ ايتۋىنشا، وتكەن جىلدىڭ سوڭىندا پوليسيا قىزمەتكەرلەرىنىڭ بازاردا زاڭسىز قىزمەتپەن اينالىسقانى بەلگىلى بولعان.
ولار لاۋازىمدىق وكىلەتتىگىن تەرىس پايدالانا وتىرىپ، «التىن وردا» بازارىندا جالپى قامقورلىعى جانە قىلمىستىق جانە اكىمشىلىك جاۋاپكەرشىلىكتەن الشاقتاتقانى ءۇشىن ساۋدا قىزمەتكەرلەرىنەن اقشا جيناۋدى ۇيىمداستىرعان.
وسىلايشا بازار اۋماعىندا الەۋمەتتىك شيەلەنىس تۋعىزعان.
«ايتا كەتۋ كەرەك، پوليسەيلەردىڭ ءبىرى اتىس قارۋىن قولدانۋ ارقىلى انتيكور قىزمەتكەرلەرىنە قارسىلىق كورسەتتى. الماتى وبلىسى قاراساي اۋداندىق سوتىنىڭ ۇكىمىمەن 3 ۋچاسكەلىك پوليسيا ينسپەكتورىنىڭ 3 جىل مەرزىمگە باس بوستاندىعى شەكتەلدى»، - دەيدى سەرىك ورىمبەتوۆ.