«التىن وردا» كوپىر قۇرىلىسى 2017 جىلدان بەرى سالىنىپ كەلەدى
«التىن وردا» بازارى ماڭىنداعى كوپىردىڭ قۇرىلىسى قىركۇيەك ايىندا تولىق اياقتالادى. بۇل تۋرالى «قازاۆتوجول» ۇلتتىق كومپانياسىنىڭ رەسمي وكىلى ارنامىزعا بەرگەن ارنايى سۇحباتىندا مالىمدەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ءقازىر قۇرىلىستىڭ 85 پايىزى بىتكەن. ەندى تەك اسفالت جابىندىلارىن توسەۋ قالىپتى.
توعىز جولدىڭ تورابىندا ورنالاسقان «التىن وردا» كوپىر قۇرىلىسى 2017 جىلدان بەرى سالىنىپ كەلەدى. سابىرى سىنالعان جۇرگىزۋشىلەر قۇرىلىسى سوزىلعان كوپىردەن ءوتۋى ءۇشىن ساعاتتاپ كەپتەلىستە تۇرامىز دەپ شاعىم ايتادى.
«وسى كوپىردى جەتى جىل سالدى عوي. ءازىر بىلىنبەيدى، كەشكە كورسەڭىز، استى دا، ءۇستى دە كەپتەلىس»، – دەدى قالا تۇرعىنى مەرەي جۇمابەكوۆ.
قالاعا كىرىپ-شىعاتىن جول قۇرىلىسىنىڭ كەشەۋىلدەۋىنە پرەزيدەنت نازار اۋدارىپ، ءتيىستى تاراپتارعا تاپسىرما بەرگەن بولاتىن.
«85% جۇمىس بىتكەن. قازىرگى ۋاقىتتا اسفالت-بەتون سالۋ جۇمىسى قالدى. اۆتوبۋس، ترانزيتتىك جولاق بولادى. سول جۇمىستار بىتكەننەن كەيىن 2 ايدىڭ ىشىندە اسفالت سالىپ بىتەمىز»، – دەدى «قازاۆتوجول» ۇك» اق الماتى وبلىستىق فيليالى ديرەكتورىنىڭ ورىنباسارى نۇرجان تاڭاتاروۆ.
الايدا مۇنداعى جۇرت ۋادەگە سەنۋدەن قالعان. داۋلى قۇرىلىسقا بۇعان دەيىن جاۋاپتى بولعان كومپانيا سوزىندە تۇرمادى دەيدى.
«ۋادەسىنە مەن سەنبەيمىن. ويتكەنى بولدى انانىڭ ءۇستىن جوندەيمىز دەپ وتكىزگەن شالا-پۇلا سول كۇيى قالدى. قايتادان رەمونتتاپ جاتىر. ەندى ونى نە دەۋگە بولادى»، – دەدى قالا تۇرعىنى اسحات يگىسىنوۆ.
ال «التىن وردا» كوپىرىن قوسا العاندا رەسپۋبليكالىق ماڭىزى بار جولداردى تەكسەرۋگە كەلگەن «قازاۆتوجول» ۇلتتىق كومپانياسىنىڭ رەسمي وكىلى، بۇعان دەيىنگى ولقىلىقتاردىڭ ورنىن تولتىرامىز دەپ وتىر. ايتۋىنشا، بۇعان دەيىنگى قۇرىلىسقا جاۋاپتى مەردىگەردىڭ قاتەلىگى جولايىرىق جۇمىسىنا كەسىرىن تيگىزگەن.
«ەلىمىزدە جالپى قۇرىلىسى ۇزاققا سوزىلعان دەپ تانىلعان ءبىرقاتار كۇرە جولداردىڭ جۇمىسى قايتا جانداندى. التىن وردانى سالعان مەردىگەر ۇيىم، جۇمىسىنا سالعىرت قاراعاندىقتان ولارمەن كەلىسىمشارت بۇزىلدى، جاڭا مەردىگەر ۇيىم كەلىپ جاتىر. ولار 5 ايدىڭ ىشىندە «التىن وردانىڭ» كوپىرىن سالىپ بەردى»، – دەدى «قازاۆتوجول» ۇك» اق باسپا ءسوز حاتشىسى لياززات ستامعازييەۆا.
جاڭا مەردىگەر كومپانيا قۇرىلىس جۇمىستارىن مەرزىمىندە اياقتاۋ ءۇشىن 200-دەن اسا ادام جالداپتى. ال، ۋاقىتشا قيىندىقتارعا تۇسىنىستىك تانىتۋىلارىن سۇرايدى.