شامامەن 50 باس قۇلان جەتكىزىلدى.
«التىن-ەمەل» ۇلتتىق پاركىنەن "ىلە-بالقاش" رەزەرۆاتىنا العاش رەت قۇلاندار جەتكىزىلدى، دەپ حابارلادى Almaty-akshamy.kz قازتاگقا سىلتەمە جاساپ.
«التىن-ەمەل ۇلتتىق پاركىنەن «ىلە-بالقاش» رەزەرۆاتىنا شامامەن 50 باس قۇلان جەتكىزىلدى. ولاردىڭ ورتاعا بەيىمدەلۋى جۇمساق تۇردە ءوتۋى ءۇشىن جانۋارلار اۋماعى 22 گەكتار بولاتىن ارنايى قورشاۋعا ورنالاستىرىلدى. ول جەردە شامامەن 5-7 اي ۋاقىتقا دەيىن بولادى، ودان كەيىن تۇياقتىلار تابيعي ورتاعا جىبەرىلمەك»، – دەلىنگەن قازاقستان رەسپۋبليكاسى ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتىنىڭ حابارلاماسىندا.
سونىمەن قاتار، اتالمىش اۋماققا تاعى دا بۇقار بۇعىلارى اكەلىندى. رەزەرۆات اۋماعىنا بۇعىلاردى جەرسىندىرۋ 2018 جىلى باستالعان بولاتىن – سول جىلى العاش رەت 5 تۇياقتى قورشاۋ ىشىنە جىبەرىلگەن. ەرەكشە قورعالاتىن تابيعي اۋماق 2019 جىلى 17 باس، 2020 جىلى 30 باس، 2021 جىلى 53 باس جانە بيىل 54 باس بۇعىمەن تولىقتى، ونىڭ 15ء-ى قازىرگى تاڭدا قورشاۋعا جىبەرىلگەن.
قىزىل كىتاپقا ەنگەن جانۋارلاردىڭ قوزعالۋ اۋماعىن باقىلاۋ ماقساتىندا ءار قورشاۋ ىشىنە 2 فوتوتۇزاقتان ورناتىلعان.