بۇگىن ەلوردادا تۇركياداعى قانداستار كوشىنىڭ 70 جىلدىق تاريحىنا ارنالعان «التايدان انادولىعا» دەرەكتى ءفيلمىنىڭ تۇساۋكەسەرى ۇيىمداستىرىلدى.
اشىق كورسەتىلىمگە تاريحشىلار، زيالى قاۋىم جانە مادەنيەت سالاسىنىڭ وكىلدەرى مەن جۋرناليستەر قاتىستى، دەپ حابارلايدى Almaty-akshamy.kz.
دەرەكتى فيلمدە تيبەت، ءۇندىستان مەن پاكىستان ارقىلى ءوتىپ، تۇركيادان پانا تاپقان قانداستار تاعدىرى، ۇلت تاريحىنداعى ەڭ ۇزاق سانالاتىن قازاق كوشىنىڭ تاريحى باياندالادى. فيلم اۆتورى – ازات رىستانبەك.
بەرەرى مول، تاعىلىمى زور تاريحي كارتينانى «وتانداستار قورىنىڭ» ۇسىنىسى بويىنشا «Qazaqstan» ۇلتتىق ارناسىنىڭ شىعارماشىلىق توبى قازاقتار قالىڭ شوعىرلانعان تۇركيا ايماقتارىندا تۇسىرگەن.
ۇلتىمىزدىڭ تامىرى تەرەڭ تاريحىن جاڭعىرتىپ، اتا-بابالار رۋحىنا تاعزىم ەتكەن تارتىمدى حابار بارىسىندا ازاتتىق اڭساپ، التايدان انادولىعا اۋعان 20 مىڭ قازاقتىڭ كوشىپ-قونعان18 جىلدا شەككەن ازابى مەن كوزسىز ەرلىكپەن ەڭسەرگەن 20 مىڭ شاقىرىمدىق جولى كوزى ءتىرى كۋاگەرلەردىڭ ەسكىرمەيتىن ەستەلىكتەرى ارقىلى اسەرلى جەتكىزىلگەن.
سونىمەن قاتار دەرەكتى فيلمدە تۇرىك عالىمدارىنىڭ قۇندى تاريحي زەرتتەۋلەرى دە ورايلى ورنىن تاپقان.
گيمالايدىڭ قۇزى مەن جارىن اسىپ، جانكەشتى قايسارلىقپەن ارىپ-اشىپ، اقىر اياعىندا 1952 جىلى تۇركياعا اۋپىرىمدەپ جەتكەن 1852 قازاقتىڭ انادولى جەرىندەگى جاڭا ورتاعا بەيىمدەلۋى، وسىپ-وركەندەۋ جولى جانە تاپ قازىرگى تاڭداعى جاي-كۇيى - باستى تاقىرىپقا تامىزىق بولعان.
شىعارماشىلىق توپ ءتۇسىرىلىم بارىسىندا قازاقتار العاش قونىستانعان ىستانبۇلدىڭ زەيتىنبۇرنى جانە باعجىلار اۋدانىنا، نيدە ايماعىنداعى التاي اۋىلىنا جانە انكارا، يزمير، ساليحلى قالالارىنا بارىپ، تۇرىك جەرىنە العاش قونىستانعان قانداستار، كوش كۋاگەرلەرى زىليحا قامزا قىزى، قاليا ادىلبەك قىزى، ارىستان شادەت ۇلى، مانسۇر ءتايجى جانە ولاردىڭ ۇرپاقتارىمەن تىلدەسىپ قايتقان.
«جالپى، ءفيلمدى تۇسىرۋدەگى ماقساتىمىز – كەيىنگى بۋىنعا ۇلت تاريحىنداعى ەڭ ۇزاق، ەڭ ازاپتى كوشتىڭ ءمانىن ءتۇسىندىرۋ بولدى. قيىن زامانداردان ءوتىپ، جات جەردە تۇراقتاۋعا ءماجبۇر بولعان قانداستارىمىز ارادا قانشا جىلدار وتسە دە، ءالى كۇنگە دەيىن ەلدى، تۋعان جەردى ۇمىتپاي كەلەدى. اتامەكەنىن اڭساعان قانداستارعا ءبىزدىڭ دە قامقورلىعىمىز، ءىلتيپاتىمىز زور. ارينە، سول زاماننىڭ اۋىرتپالىعىن دا، ءبىزدىڭ قانداستارىمىزعا دەگەن قۇرمەتىمىزدى دە ءبىر فيلمگە سىيعىزۋ مۇمكىن ەمەس. مۇنداي جوبالار الداعى ۋاقىتتا جالعاسىن تابادى. بۇگىنگى فيلم دە ۇلت تاريحىنداعى ايتۋلى كوشتىڭ 70 جىلدىعىنان بولەك، ەكى ەل اراسىنداعى بايلانىستىڭ 30 جىلدىعىنا ارنالىپ وتىر»، - دەدى شارانىڭ اشىلۋىندا «قازاقستان» ۇلتتىق ارناسىنىڭ باسقارما ءتورايىمى ءلاززات تانىسباي.
دەرەكتى ءفيلمنىڭ تەليەۆيزيالىق نۇسقاسى «Qazaqstan» ارناسىنان تاۋەلسىزدىك كۇنى قارساڭىندا ەفيرگە شىعادى.
ايتا كەتەيىك، 26 قاراشا كۇنى تۇركيانىڭ ىستانبۇل قالاسىندا «التايدان انادولىعا: ازاتتىق اڭساعان قازاق كوشى» اتتى دەرەكتى ءفيلمنىڭ تۇرىك تىلىندەگى تۇساۋكەسەرى وتكەن بولاتىن.