التايدا حالىقارالىق اقىندار ايتىسى وتەدى

ۇزدىك ايتىسكەرگە بەس ميلليون تەڭگە بۇيىرادى

شىعىس قازاقستان وبلىسى كاتونقاراعاي اۋدانىندا وتەتىن "التايداي جەر قايدا؟" اتتى حالىقارالىق ايتىسقا 16 اقىن قاتىسادى، دەپ حابارلايدى Almaty-akshamy.kz inbusiness.kz-كە سىلتەمە جاساپ.

التاي تاۋىنىڭ باۋرايىندا وتەتىن حالىقارالىق ايتىسقا قازاقستان، وزبەكستان، قىرعىز جانە موڭعوليا ەلدەرىنىڭ ايتىسكەر اقىندارى قاتىسادى. ەلىمىزدەن بەكارىس شويبەكوۆ، مۇحتار نيازوۆ، رينات زايىتوۆ، ەركەبۇلان قاينازاروۆ، رۇستەم قايىرتاي، اسەم ەرەجە، شۇعايىپ سەزىمحان، قاليجان دىلداشيەۆ، قازىرەت بەردىحان، جارقىن جۇپارحان، سەرىك قۋانعان، اردابەك اقبابا سىندى اقىندار ب ا ق سىنايدى. اقىنداردىڭ ونەرىنە الماس احمەتبەك، ۇلىقبەك ەسداۋلەت، سەرىك قۇسانبايەۆ، سەرىك قالييەۆ، داۋلەتكەرەي كاپ ۇلى مەن كامەل جۇنىستەگى قازىلىق ەتەدى. ايتىستى بەلگىلى اقىن، قازاقستاننىڭ ەڭبەك سىڭىرگەن قايراتكەرى ءجۇرسىن ەرمان جۇرگىزەدى. 

ايتىس 1 شىلدەدە ساعات 10:00-دە كاتونقاراعاي اۋىلىنداعى ورتالىق ساياباقتا باستالادى. العاش رەت ۇيىمداستىرىلىپ وتىرعان حالىقارالىق ايتىستىڭ جالپى جۇلدە قورى 13 ملن تەڭگەدەن اسادى،  ۇزدىك ايتىسكەرگە بەس ميلليون تەڭگە بۇيىرادى.

ايتىس ەكى كەزەڭنەن تۇرادى – ىرىكتەۋ جانە فينال. ماقساتى بابادان جالعاسقان ۇلتتىق ايتىس ونەرىن ۇلىقتاپ، التاي تاۋىنىڭ كوركەمدىگىن دارىپتەۋ.