استانا قالاسىنىڭ اكىمى التاي كولگىنوۆ ق ر پرەزيدەنتىن ۇلىقتاۋ راسىمىنەن كەيىن LRT قۇرىلىسى تۋرالى پىكىر ءبىلدىردى، دەپ حابارلايدى Almaty-akshamy.kz Inform.kz-كە سىلتەمە جاساپ.
«LRT تۋرالى ايتساق، جۇمىس باستالىپ كەتتى. ءبىرىنشى ترانشتىڭ اقشاسى ءبولىندى. ءقازىر ينجەنەرلىك قۇراندى بولشەكتەرى مەن ارقالىقتارى ورناتىلىپ جاتقانىن كورىپ جۇرسىزدەر. ءقازىر وسىنىڭ ءبارى ءجۇرىپ جاتىر. ءبىزدىڭ مىندەت – LRT قۇرىلىسىن اياقتاۋ. كەلەسى جىلدىڭ بولجامى بويىنشا استانادا 1،5 ملن ادام تۇراتىن بولادى. بۇل جىل ءالى اياقتالعان جوق. تاعى 100 مىڭ ادام قوسىلاتىن شىعار. باس جوسپار بويىنشا 5-6 جىلدان كەيىن استانامىزدا 2 ملن ادام تۇرادى دەگەن بولجام بار»، - دەدى اكىم ق ر پرەزيدەنتىن ۇلىقتاۋ راسىمىنەن كەيىن ب ا ق وكىلدەرىنە بەرگەن سۇحباتىندا.
سونداي-اق، ول اتالعان قۇرىلىسقا ءالى 580 ملن دوللار كەرەك ەكەنىن ەسكە سالدى.
«جۇڭگو كونسورسيۋمىمەن قازاقستان تاراپى اراسىندا مىندەتتەمەلەر مەن كەلىسىمدەرگە قول قويىلعان. ەندى قۇرىلىستى اياقتاۋ عانا قالدى. تاعى 580 ملن دوللار كەرەك. ءبىرىنشى ترانشپەن 20 ملرد تەڭگە بولىنگەن. ەكىنشى ترانش اياسىندا جەلتوقسان ايىندا 30 ملرد تەڭگە بولىنەدى. كەلىسىم جۇڭگو كونسورسيۋمى مەن قازاقستان اراسىندا عانا جاسالعان. باسقا كەلىسىمدەر جوق. قازاقستان تاراپى تاپسىرىس بەرۋشى بولىپ وتىر»، - دەدى التاي كولگىنوۆ.