قازاقستان رەسپۋبليكاسىنىڭ ۇلتتىق كىتاپحاناسىنىڭ ن. داۋلەتوۆا اتىنداعى زالىندا قازاقستان جازۋشىلار وداعىنىڭ مۇشەسى، حالىقارالىق «الاش» ادەبي سىيلىعىنىڭ جانە «پاراسات» وردەنىنىڭ يەگەرى، اقىن، اۋدارماشى، فيلولوگيا عىلىمدارىنىڭ دوكتورى، پروفەسسور، قازاقستاننىڭ ەڭبەك سىڭىرگەن قايراتكەرى، ر.ب. سۇلەيمەنوۆ اتىنداعى شىعىستانۋ ينستيتۋتىنىڭ باس ديرەكتورى دۇكەن ءماسىمحان ۇلىنىڭ «التاي بي» اتتى تاريحي داستانىنىڭ تۇساۋكەسەرى ءوتتى. شاراعا بەلگىلى تاريحشىلار، مەملەكەت جانە قوعام قايراتكەرلەرى، ب ا ق وكىلدەرى جانە باسقا دا قوناقتار قاتىستى.
شارانىڭ مودەراتورى – «قۇرمەت» وردەنىنىڭ يەگەرى، قازاقستاننىڭ ەڭبەك سىڭىرگەن قايراتكەرى، قازاق راديوسىنىڭ رەداكتورى قوشان مۇستافا بولدى. كونفەرەنسيانى عالىم-اگرونوم، اۋىلشارۋاشىلىعى عىلىمدارىنىڭ دوكتورى، قازاق اگرارلىق زەرتتەۋ ۋنيۆەرسيتەتىنىڭ پروفەسسورى ءالىمقۇلوۆ ءدامىر مالىمبەك ۇلى اشتى.
شارا بارىسىندا ل.ن. گۋميليەۆ اتىنداعى ەۇۋ پروفەسسورى، فيلولوگيا عىلىمدارىنىڭ دوكتورى سەرىك نىعمەتوللا ۇلى نەگيموۆ، فيلولوگيا عىلىمدارىنىڭ دوكتورى، پروفەسسور بايىنقول قالي ۇلى، ءال-فارابي اتىنداعى قازۇۋ پروفەسسورى، فيلولوگيا عىلىمدارىنىڭ دوكتورى قانسەيىت ابدەز ۇلى، تاريح عىلىمدارىنىڭ دوكتورى، پروفەسسور ءنابيجان مۇحامەتحان ۇلى، ق ر ۇعا اكادەميگى بەرەكەت باقىتجان ۇلى كارىبايەۆ، ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس ديرەكتورى، ق ر ۇعا اكادەميگى زيابەك ەرمۇحان ۇلى قابۋلدينوۆ «التاي بي» داستانىنا قاتىستى بايانداما جاسادى.
«التاي بي» كىتابىنىڭ تۇساۋكەسەرىن بايىنقول قالي ۇلى، سەرىك نىعمەتوۆ، قانسەيىت ابدەز ۇلى، ءنابيجان مۇحامەتحان ۇلى، بەرەكەت كارىبايەۆ، زيابەك قابۋلدينوۆ، ءدامىر ءالىمقۇلوۆ، قازىبەكبي بۇيتەك ۇلى جانە اۆتور دۇكەن ءماسىمحان ۇلى جاسادى. داستاننىڭ اۆتورى ءوز سوزىندە كونفەرەنسيا قاتىسۋشىلارى مەن قوناقتارىنا، سونداي-اق «نايمانباي ۇلى التاي بي» قوعامدىق بىرلەستىگىنە العىسىن ءبىلدىرىپ، كىتاپتىڭ شىعۋ تاريحىن باياندادى.
تۇساۋكەسەر راسىمىندە اقىن، اۋدارماشى قاستەر سارقىتاحان ۇلى مەن اقىن ماقسات ەرەجەپوۆ ارناۋ ولەڭدەرىن وقىدى. انشىلەر ەربول سپاندييەۆ پەن سەرجانالى الىبەك «التاي، بيىك تىرەگىم» ءانىن ورىندادى.
كونفەرەنسيانى «نايمانباي ۇلى التاي بي» قوعامدىق بىرلەستىگىنىڭ ءتوراعاسى، زاڭ عىلىمدارىنىڭ كانديداتى، پروفەسسور قازىبەكبي بۇيتەك ۇلى قورىتىندىلادى.