اتالعان ىسكە «اتامەكەن» ۇكپ بۇرىنعى باسقارما ءتوراعاسى ا.ي. مىرزاحمەتوۆتىڭ دە قاتىسى بار.
سىبايلاس جەمقورلىققا قارسى ءىس-قيمىل اگەنتتىگى ەڭبەك جانە الەۋمەتتىك قورعاۋدىڭ بۇرىنعى ۆيسە-مينيسترى، ءماجىلىستىڭ ەكس-دەپۋتاتى نۇرجان التايەۆتىڭ قانداي كۇدىككە ىلىنگەنىن مالىمدەدى، دەپ حابارلايدى Almaty-akshamy.kz.
«7 ماۋسىمدا سىبايلاس جەمقورلىققا قارسى قىزمەت جاسىرىن ءىس-شارالار كەشەنىنىڭ ناتيجەلەرى بويىنشا ەكس-ۆيسە-مينيستر نۇرجان التايەۆتى اسا اۋىر جەمقورلىق قىلمىس جاسادى دەگەن كۇدىك بويىنشا ۇستادى. ن.ب. التايەۆ ەڭبەك جانە الەۋمەتتىك قورعاۋ ۆيسە-مينيسترى، كەيىننەن ق ر پارلامەنتى ءماجىلىسىنىڭ دەپۋتاتى رەتىندە جۇيەلى نەگىزدە «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ا.ي.مىرزاحمەتوۆتەن اسا ءىرى مولشەردە پارا الدى دەپ كۇدىكتەنەدى»، - دەلىنگەن حابارلامادا.
بەلگىلى بولعانداي، 2018-2020 جىلدار كەزەڭىندە جاۋاپتى مەملەكەتتىك لاۋازىمداردى اتقارا وتىرىپ، ول ا.ي.مىرزاحمەتوۆتىڭ مۇددەسى ءۇشىن ارەكەت ەتىپ، ونىڭ ۇيىمىنا مەملەكەتتىك تاپسىرىستاردى الۋىنا ىقپال ەتىپ، جالپى قامقورشىلىق كورسەتكەن.
ءقازىر ن.ب.التايەۆ استانا قالاسى پوليسيا دەپارتامەنتىنىڭ ۋاقىتشا ۇستاۋ يزولياتورىنا قامالدى. تەرگەۋ جالعاسۋدا.
ق ر قپك 201-بابىنا سايكەس تەرگەۋ مۇددەسى ءۇشىن وزگە اقپارات جاريا ەتۋگە جاتپايدى.
كونستيتۋسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.