الماتىنىڭ «كەڭساي-1» جانە «كەڭساي-2» زيراتتارىندا بىرنەشە رەت عۇرىپتىق كەرەك-جاراقتار، قورشاۋلار، ءمارمار ەسكەرتكىشتەر مەن جيەكتاستار ۇرلانعان.
بۇل تۋرالى الماتى اكىمدىگىنىڭ باسپا ءسوز قىزمەتى ءمالىم ەتتى، دەپ حابارلايدى Almaty-akshamy.kz
«ۆانداليزم، عۇرىپتىق كەرەك-جاراقتاردى، قورشاۋلاردى، ءمارمار ەسكەرتكىشتەر مەن جيەكتاستار «كەڭساي-1» جانە «كەڭساي-2» زيراتتارىندا ۇرلاناتىنىن حابارلايمىز. قالعان زيراتتاردا مۇنداي فاكتىلەر بىردى-ەكىلى عانا نەمەسە مۇلدە تىركەلمەگەن. زيرات قىزمەتكەرلەرى بىرنەشە رەت ۇرلىقتىڭ جولىن كەسىپ، قىلمىسكەردى ۇستاپ، پوليسيا قىزمەتكەرلەرىنە تاپسىردى»، - دەپ حابارلادى اكىمدىكتىڭ باسپا ءسوز قىزمەتى.
مەدەۋ اۋدانىنىڭ پوليسيا باسقارماسى جانىنداعى پوليسيا ءبولىمىنىڭ مالىمەتىنشە، جىل باسىنان بەرى «كەڭساي» زيراتىندا ۇرلىق جاسادى، ياعني ق ر قك 188-بابى بويىنشا بوتەننىڭ مۇلكىن ۇرلادى دەگەن كۇدىكپەن ءۇش ادام ۇستالعان.
«ۇرلىقشىنىڭ زاتىن ساتىپ الۋشى دا ۇستالىپ، قىلمىستىق جاۋاپقا تارتىلدى، جەدەل ءىس-شارالار كورسەتكەندەي، ول قىلمىستىق جولمەن الىنعانىن بىلە تۇرا قاسكۇنەمنىڭ زيراتتان الىنعان مۇلكىن ۇنەمى ساتىپ الىپ وتىرعان. ونىڭ ىس-ارەكەتى ق ر قك 196-بابى 2-تارماعى بويىنشا سارالانعان. سونىمەن قاتار، بىلتىر الماتى پوليسەيلەرى «كەڭساي» زيراتىندا ءبىرقاتار ۇرلىق جاسادى دەگەن كۇدىكپەن ەكى ەر ادامدى ۇستاعان. 1989 جىلى تۋعان ك. ەسىمدى جانە 1995 جىلى تۋعان ا. ەسىمدى ازاماتتار 20 رەت ۇرلىق جاساعان. سول كەزدە ۇرلانعان مۇلىكتى ساتىپ الۋشى دا قولعا ءتۇستى، ول 1988 جىلى تۋعان ت. ەسىمدى ازامات قاسكۇنەمدەردەن شويىن قورشاۋلاردى ساتىپ الىپ وتىرعان»، - دەلىنەدى اكىمدىكتىڭ حابارلاماسىندا.
بۇگىنگى كۇنى «مامانداندىرىلعان سالتتىق قىزمەت كورسەتۋ كومبيناتى» ج ش س (ارى قاراي - سەرىكتەستىك) «جەرلەۋدىڭ جانە زيراتتاردى قاراپ-كۇتۋ جونىندەگى ءىستى ۇيىمداستىرۋ قاعيدالارىنا» سايكەس، قالا زيراتتارىن كۇتىپ-ۇستاۋ (اۋماقتى جيناۋ، قوقىس پەن قاردى شىعارۋ، اعاشتار مەن بۇتالاردى سانيتارلىق ماقساتتا كەسۋ جانە جالپىعا ورتاق پايدالانىلاتىن اۋماقتا قۇلاتۋ) بويىنشا قىزمەت كورسەتەدى.
«الماتى قالاسى ءماسليحاتىنىڭ 2022 جىلعى 8 ماۋسىمداعى №139 جانە ق ر بك شەشىمىمەن بەكىتىلگەن 3.02-141-2014 «زيراتتاردى جوبالاۋ جانە كۇتىپ ۇستاۋ» ەرەجەسىنىڭ 15.3.5 تارماعى بويىنشا جەرلەۋگە بولىنگەن ۋچاسكەنىڭ شەكاراسىنداعى بەيىت قۇرىلىسى - تۋىستارىنىڭ نەمەسە ولاردى قۇرعان مەكەمەلەردىڭ مەنشىگى بولىپ تابىلادى. دەمەك، سەرىكتەستىك مۇلىكتىڭ (ءقابىر ۇستىندەگى قۇرىلىستار، قورشاۋلار) ساقتالۋىنا جاۋاپ بەرمەيدى»، - دەپ حابارلادى اكىمدىكتە.
الماتى قالاسى جەتىسۋ اۋدانى اكىمىنىڭ اپپاراتى جەرلەۋ ورىندارىن كۇتىپ-ۇستاۋ (اۋماقتى سانيتارلىق تازارتۋ، قوقىس پەن قاردى شىعارۋ، جالپى پايدالانۋ اۋماعىندا اعاشتار مەن بۇتالاردى سانيتارلىق ماقساتتى كەسۋ، قۇلاتۋ) جانە زيراتتاردى كۇزەتۋ جونىندەگى بيۋدجەتتىك باعدارلامانىڭ اكىمشىسى بولىپ تابىلادى. «مسقكك» ج ش س جىل سايىن جەتىسۋ اۋدانى اكىمىنىڭ اپپاراتى وتكىزەتىن كونكۋرستىق نەگىزدە مەملەكەتتىك ساتىپ الۋ شارتىنا سايكەس قىزمەت كورسەتەدى. جەتىسۋ اۋدانى اكىمىنىڭ اپپاراتى جىلدا جەرلەۋ ورىندارىن كۇزەتۋگە كونكۋرس وتكىزەدى. زيراتتاردى كۇزەتۋدە جەكە كۇزەت اگەنتتىگى قىزمەت كورسەتەدى. 2023 جىلى «Star Wolf Security» ج ش س كۇزەت قىزمەتىن كورسەتىپ كەلەدى. كۇزەتكە بولىنگەن قاراجات جوعارىدا اتالعان زيراتتارعا ەكى بەكەتتەن عانا ەسەپتەلگەن.
«قورعالاتىن نىسانداردىڭ جالپى اۋدانى 197،2 گەكتار بولعاندىقتان، قورعالاتىن نىساننىڭ بارلىعىنى باقىلاۋدا ۇستاۋ مۇمكىن ەمەس. جوعارىدا اتالعان جايتتارعا قاراماستان، زيراتتار مەن كۇزەت ۇيىمىنىڭ قىزمەتكەرلەرى تالاي رەت ۇرلىق-قارلىقتىڭ جولىن كەسىپ، قىلمىسكەرلەر ۇستالىپ، پوليسيا قىزمەتكەرلەرىنە بەرىلدى. اكىم اپپاراتى 2024 جىلى زيراتتاردى كۇزەتۋ ءۇشىن قوسىمشا كۇزەت بەكەتتەرىن قوسۋ جانە تۇنگى ۋاقىتتا زيراتتار ىشىندە پاترۋلدەۋ ءۇشىن قارجىلاندىرۋدى كوبەيتۋدى جوسپارلاپ وتىر. سونىمەن قاتار، الماتى قالاسى جەتىسۋ اۋدانى اكىمىنىڭ اپپاراتى بيىل بەينەمونيتورينگ جۇيەلەرىنىڭ جەلىسىن كەڭەيتۋ جوباسى اياسىندا زيراتتار اۋماعىندا بەينەباقىلاۋ كامەرالارىن ورناتۋعا الماتى قالاسى سيفرلاندىرۋ باسقارماسىنا ءوتىنىم جولدادى»، - دەپ حابارلادى اكىمدىكتە.
«سۆم-6000» جوباسى بويىنشا جەتىسۋ اۋدانىندا قوسىمشا 750 كامەرا ورناتۋ كوزدەلگەن، ونىڭ ىشىندە «كەڭساي-1»، «كەڭساي-2» زيراتتارى بار. جۇمىس 2023 جىلدىڭ سوڭىنا دەيىن اياقتالادى دەپ جوسپارلانعان. 2024 جىلى «حالىق قاتىساتىن بيۋدجەت» باعدارلاماسى اياسىندا جەتىسۋ اۋدانىنداعى زيراتتاردىڭ پەريمەترى بويىنشا جالپى ۇزىندىعى 3 شاقىرىم قورشاۋلارعا (رايىمبەك داڭعىلىنداعى ورتالىق بەيىت، رىسقۇلوۆ داڭعىلى مەن كەمەل شاعىن اۋدانى، جولىمبەت كوشەسىندەگى زيرات) اعىمداعى جوندەۋ جۇمىستارى جوسپارلانعان.
ەسكە سالايىق، الماتىنىڭ زيراتتارىندا مارقۇمدارعا بولىنەتىن ورىندار قىمبات باعامەن ساتىلاتىنى تۋرالى قالا تۇرعىنى الەۋمەتتىك جەلىدە جازعان بولاتىن.