الماتى قالاسى كاسىپكەرلىك جانە ينۆەستيسيالار باسقارماسىنىڭ شجق «قالالىق ۆەتەرينارلىق قىزمەتى» كمك بۇرالقى جانۋارلاردى اۋلاۋ قىزمەتىنىڭ ماتەريالدىق-تەحنيكالىق بازاسىن نىعايتقانىن حابارلايدى. بۇرالقى جانۋارلاردى اۋلاۋ قىزمەتىنىڭ كولىك پاركى 16 جاڭا بىرلىكپەن تولىقتى، دەپ حابارلايدى almaty-akshamy.kz
بيىل 29 ناۋرىزدان باستاپ جاڭا ارنايى تەحنيكالار قالانىڭ بارلىق اۋدانىندا جۇرەدى. اۆتوموبيلدەردى اۋداندارعا ءبولۋ جانە اۋلاۋ بريگادالارىن ناقتى اۋماقتارعا بەكىتۋ اۋدان اكىمدىكتەرىمەن جاساسقان مەموراندۋمعا سايكەس جۇزەگە اسىرىلادى.
جاڭا تەحنيكانى قولدانۋ اۋلاۋ قىزمەتى جۇمىسىنىڭ جەدەلدىگى مەن تيىمدىلىگىن ايتارلىقتاي ارتتىرۋعا، جانۋارلاردى تاسىمالداۋ جاعدايىن جاقسارتۋعا، ولاردىڭ قاۋىپسىزدىگىن قامتاماسىز ەتۋگە جانە ادامگەرشىلىكپەن قاراۋعا مۇمكىندىك بەرەدى.
باستى ماقسات – تۇرعىنداردىڭ قاۋىپسىزدىگىن قامتاماسىز ەتۋ، مالدان ادامعا جۇعاتىن اۋرۋلاردىڭ الدىن الۋ، الماتى قالاسىنىڭ اۋماعىندا قاراۋسىز قالعان جانۋارلاردىڭ سانىن ازايتۋ.