الماتىنىڭ ۇزدىك تاۋارلارى انىقتالدى

الماتى قالاسى بويىنشا «قازاقستاننىڭ ۇزدىك تاۋارى» وڭىرلىك كورمە-بايقاۋى ءوتتى.

بايقاۋعا 80-گە جۋىق الماتىلىق كومپانيا ءوتىنىم بەردى. بيىل كورمە ق ر تۇڭعىش پرەزيدەنتى ساياباعىندا ۇيىمداستىرىلدى، دەپ حابارلايدى Almaty-akshamy.kz.

قاز قاتار تىزىلگەن اق شاتىرلار وتاندىق ءونىمنىڭ ءتۇر-تۇرىن قالا تۇرعىندارى مەن قوناقتارىنا ۇسىندى.

ازىق-تۇلىك ونىمدەرى، ۇلتتىق ناقىشتاعى بۇيىمدار، كيىم، اياق كيىم، كورپە-جاستىقتان باستاپ، كابەل، جيھاز، ادامنىڭ قان قىسىمى مەن جالپى جاي-كۇيىن بىردەن انىقتايتىن جوعارى تەحنولوگيالىق اپپاراتتار قويىلدى.

«داستۇرگە اينالعان «قازاقستاننىڭ ۇزدىك تاۋارى» كورمە بايقاۋى الماتىلىق وندىرۋشىلەر ءۇشىن جىلسايىنعى مەرەكە ىسپەتتى. كورمە ارقىلى قالا تۇرعىندارى مەن قوناقتارى وتاندىق ونىمدەردى كورەدى، جوعارى ساپاداعى تاۋارلاردى وزىندىك قۇنمەن ساتىپ الۋعا مۇمكىندىك الادى. كاسىپكەرلەر بىر-بىرىمەن تانىسادى، نارىقتاعى الەۋەتتى، باسەكەلەستەردى باعالايدى، ءوزارا ىسكەرلىك بايلانىس ورناتادى. بۇگىن كورمەگە بالالارىن ەرتىپ كەلگەن وتباسىلاردىڭ كوپتىگى قۋانتتى»، – دەدى الماتى قالاسى كاسىپكەرلەر پالاتاسىنىڭ باسقارۋشى ديرەكتورى ناريمان يبراگيموۆ.

مىناداي ءۇش نوميناسيا بويىنشا «وندىرىستىك ماقساتتاعى ۇزدىك تاۋارلار»، «حالىققا ارنالعان ۇزدىك تاۋارلار تاۋارلار»، «ۇزدىك ازىق-تۇلىك تاۋارلارى» ۇزدىك تاۋار وندىرۋشىلەر انىقتالدى. جەڭىمپازداردى جەرگىلىكتى اتقارۋشى ورگاندار، بيزنەس-قوعامداستىق، كاسىپكەرلەر پالاتاسى جانىنداعى وڭىرىك كەڭەستىڭ مۇشەلەرىنەن قۇرىلعان ارنايى كوميسسيا انىقتادى. ءار نوميناسيا بويىنشا 3 جەڭىمپاز ىرىكتەلدى.   وڭىرلىك ىرىكتەۋدىڭ جەڭىمپازدارى جىلدىڭ سوڭىندا ق ر پرەزيدەنتىنىڭ قاتىسۋىمەن وتەتىن رەسپۋبليكالىق بايقاۋعا قاتىسادى.

الماتى قالاسى كاسىپكەرلىك جانە ينۆەستيسيالار باسقارماسىنىڭ مالىمەتىنشە، وڭتۇستىك استانا – قازاقستانداعى كاسىپكەرلىك باستامانىڭ ورتالىعى. قالادا وڭىرلىك ەكونوميكانىڭ جارتىسىنان استامىن (53،9%) قۇرايتىن شاعىن جانە ورتا بيزنەس دامىعان. وندا 871،9 مىڭ ادام نەمەسە ەكونوميكالىق بەلسەندى حالىقتىڭ 79،5%-ى جۇمىس ىستەيدى.

«بۇگىنگى تاڭدا شاعىن جانە ورتا بيزنەس قالا ەكونوميكاسىنىڭ ىرگەتاسى ىسپەتتى. قالادا بارلىعى 380 مىڭ شاعىن جانە ورتا كاسىپكەرلىك سۋبەكتى تىركەلگەن. بۇل 2022 جىلمەن سالىستىرعاندا 22%-عا جوعارى كورسەتكىش (312 784 بىرلىك). جۇمىس ىستەپ تۇرعان شوك سۋبەكتىلەرىنىڭ سانى 323 083 بىرلىكتى قۇرايدى. بۇل 2022 جىلدىڭ ۇقساس كەزەڭىنەن 39%-عا جوعارى (233 030 بىرلىك). رەسپۋبليكا بويىنشا جۇمىس ىستەپ تۇرعان شوك سۋبەكتىلەرىنىڭ جالپى سانىنداعى الماتىنىڭ ۇلەس سالماعىنىڭ شامامەن 16،2% قۇرايدى، سول ارقىلى وسى كورسەتكىش بويىنشا مەگاپوليس جىل سايىن قازاقستان بويىنشا ءبىرىنشى ورىندى الادى»، – دەپ اتاپ ءوتتى الماتى قالاسى كاسىپكەرلىك جانە ينۆەستيسيا باسقارماسىنىڭ  جەتەكشىسى بەرىك سولتانبايەۆ.

كورمە-بايقاۋعا كەلگەن قوناقتارعا ارناپ كونسەرتتىك باعدارلاما جانە باعالى سىيلىقتار ۇتىسى ۇيىمداستىرىلدى.

«ساپا سالاسىنداعى بەدەلدى بايقاۋعا ەكىنشى رەت قاتىسىپ جاتىرمىز. بىزگە ءوز سالامىزدا ۇزدىك بولۋ، باسقا ارىپتەسترەمن تانىسۋ ماڭىزدى. بىلتىر «ىسكەر» نوميناسياسىندا ۇزدىك اتاندىق. جالپى يننوۆاسيالىق تەحنولوگيالار سالاسىندا ىلگەرىلەۋ بار، وسى باعتىڭ دامۋىنا ۇلەس قوسىپ جاتقانىمىزعا قۋانىشتىمىن. وتاندىق وندىرۋشىلەردى قولدايتىن وسىنداي كورمەلەر جىلىنا بىرنەشە رەت وتكىزىلۋى كەرەك دەپ سانايمىز»، – دەدى «مەد365» ج ش س ديرەكتورى شىڭعىس قۇلاحمەتوۆ.

سونداي-اق، العاش رەت «قازاقستاننىڭ ۇزدىك تاۋارى» كورمە-بايقاۋى اياسىندا جەرگىلىكتى شيكىزاتتان وندىرىلگەن «ءبىر اۋىل – ءبىر ءونىم» جوباسىنا قاتىسۋشىلاردىڭ ونىمدەرى ۇسىنىلدى. بايقاۋ قولونەرشىلەردى ىنلاتاندىرۋ، مىقتى شەبەرلەردى انىقتاۋعا باعىتتالعان. قولونەرشىلەر ەتنيكالىق ستيلىندە توپتامالار، قىش، ساز، مەتالل، كيىز جانە جىبەكتەن جاسالعان بۇيىمدار، زەرگەرلىك بۇيىمدار مەن كادەسىيلاردى كوپشىلىك نازارىنا ۇسىندى.

ايتا كەتيىك، «ءبىر اۋىل – ءبىر ءونىم» جوباسى كاسىپكەرلىكتى دامىتۋ جونىندەگى 2021-2025 جىلدارعا ارنالعان ۇلتتىق جوبا شەڭبەرىندە قۇرىلعان «مەن كاسىپكەر» باعدارلاماسىنىڭ قۇراۋىشى.

بايقاۋ كوميسسياسىنىڭ شەشىمىمەن «وندىرىستىك ماقساتتاعى ۇزدىك تاۋارلار» نوميناسياسىندا ادامنىڭ قان قىسىمى مەن جالپى جاي-كۇيىن بىردەن انىقتايتىن جوعارى تەحنولوگيالىق ءاپپاراتتاردى وندىرەتىن  «Meb365» ج ش س،  قۇبىرلارلارعا ەسەپ اسپاپتارى جانە قوسالقى بولشەكتەردى شىعاراتىن «قازاقستان قۇبىر جۇرگىزۋ جۇيەلەرى» ج ش س، كەراميكالىق گرانيت، تابيعي تاس وندىرەتىن «City stone» ج ش س ۇزدىك اتاندى.

 «حالىققا ارنالعان ۇزدىك تاۋارلار تاۋارلار» نوميناسياسىندا  تۇرمىستىق حيميا ونىمدەرىنىڭ كەڭ سپەكترىن وندىرەتىن «Microhim» ج ش س، بيو تىڭايتقىشتار، تورت-تۇلىككە ارنالعان بيولوگيالىق قوسپالاردى ءوندىرۋشى «Black biotechnology» ج ش س، جىلۋ ساقتاۋ، وقشاۋلاعىش ماتەريالداردى شىعاراتىن «Teplostil» ج ش س توپ جاردى. 

«ۇزدىك ازىق-تۇلىك تاۋارلارى» نوميناسياسىندا فاست-فۋد ونىمدەرىن دايىندايتىن «Red Dragon Almaty» ج ش س، تابيعي شىرىندار، كومپوت، سۋسىن ءوندىرۋشى «شارىن شىرىنى» جەكە كاسىپكەرلىگى، ورگانيكالىق ازىق-تۇلىك ونىمدەرىن وندىرەتىن «Organic foods»  ج ش س جەڭىسكە جەتتى.

بۇل كومپانيالار وڭتۇستىك استانانىڭ بەدەلىن رەسپۋبليكالىق دەڭگەيدە وتەتىن بايقاۋدا قورعايتىن بولادى.

«ءبىر اۋىل – ءبىر ءونىم» بايقاۋىندا قاتىسۋشىلار ىرىكتەۋدىڭ باعالاۋ كەزەڭىنەن ءوتتى. بايقاۋ جەڭىمپازدارى كوميسسيانىڭ داۋىس بەرۋىنەن سوڭ 10 كۇننەن كەيىن جاريالانادى.