حالىق ماسەلەنى قالا اكىمىمەن كەزدەسۋ كەزىندە كوتەرگەن
الماتىنىڭ تۇركسىب اۋدانىندا تەمىر جول بويىنان جاڭا جەرۇستى وتكەلى سالىنباق، دەپ حابارلايدى Almaty-akshamy.kz Almaty.tv-گە سىلتەمە جاساپ.
شاسكيي جانە ەرجانوۆ كوشەلەرى ماڭىنان جاسالاتىن كوپىردىڭ قۇرىلىسى كەلەسى جىلى اياقتالماق. قالاداعى شويىن جولدىڭ باسىم بولىگى تۇركسىب اۋدانىندا ورنالاسقاندىقتان تۇرعىندار تەمىر جولدى كەسىپ وتۋگە ءماجبۇر. جەرگىلىكتى حالىق بۇل ماسەلەنى قالا اكىمى ەربولات دوسايەۆپەن كەزدەسۋ كەزىندە دە كوتەرگەن. ەندى جۇرتشىلىقتىڭ تالاپ-تىلەگى ورىندالماق.
بۇل – ۇلكەن الماتى كانالى جانىنداعى شويىن جول. ءسۇيىنباي كوشەسى بويىندا ورنالاسقان تەمىر جولدىڭ ۇزىندىعى – 5 شاقىرىم. مۇندا تۇرعىندار ءۇشىن ارنايى وتكەل جاسالماعان. سالدارىنان جىل باسىنان بەرى شويىن جولدى زاڭسىز كەسىپ ءوتۋدىڭ 50-گە جۋىق دەرەگى تىركەلىپتى. كولىكتەگى پوليسيا دەپارتامەنتى ماماندارى تۇرعىندارعا ءتۇسىندىرۋ جۇمىستارىن جۇرگىزسە دە، ونى ەسكەرەتىندەر از دەيدى.
«الماتى-1 جەلىلىك باسقارماسىنىڭ جەلىلىك پوليسياسىنىڭ قىزمەت كورسەتۋ ايماعىندا 9 جازاتايىم وقيعا ورىن الدى. ونىڭ ىشىندە الماتى-1، الماتى-2 ستانساسىندا 6 جازاتايىم وقيعانىڭ بەسەۋى قايعىلى جاعدايمەن اياقتالدىن»، – دەدى الماتى-1 ستانساسىنداعى جەلىلىك پوليسيا باسقارماسىنىڭ اعا ينسپەكتورى اقمارال اقمولدايەۆا.
اۋدان تۇرعىندارى بالالارىنىڭ ءومىرى ءۇشىن الاڭدايدى. سەبەبى وقۋشىلار مەكتەپكە بارۋ ءۇشىن تەمىر جولدىڭ ارعى بەتىنە وتەدى. ەندى جاڭا جەرۇستى وتكەلىنىڭ سالىناتىنىن ەستىگەن كوپشىلىك ريزاشىلىعىن ءبىلدىرىپ جاتىر.
«شاعىن اۋداندا 2 مەكتەپ بار. وقۋ جىلى باستالعاندا تاڭەرتەڭ بالاسىن ەرتىپ العان اتا-انا مەن وقۋشىلار وسى جولمەن وتەدى. باسقا اينالىپ وتەر جول جوق. كوپىر سالىنسا، تۇرعىندار يگىلىگىن كورەر ەدى»، – دەدى قالا تۇرعىنى ۆيكتوريا شۋلگينا.
جول بويىندا پويىز تۇرىپ قالعاندا تۇرعىندار ۆاگوننىڭ استىمەن وتۋگە دە ءماجۇر بولادى ەكەن. بۇل اسىرەسە بالالار مەن ەگدە جاستاعى تۇرعىندار ءۇشىن اسا ءقاۋىپتى.
اۋدان اكىمدىگى ماسەلەدەن حاباردار. تۇرعىندار بۇل سۇراقتى قالا اكىمى ەربولات دوسايەۆپەن كەزدەسۋ كەزىندە دە كوتەرگەن. تۇيتكىلدى قالا باسشىلىعى كوپ ۇزاماي شەشىپ بەرەتىنىن ايتتى. جاۋاپتى سالا ماماندارىنا بىردەن تاپسىرما جۇكتەلدى. كەلەر جىلى جەرۇستى وتكەلىنىڭ قۇرىلىسى باستالادى.
«جوبالىق-سمەتالىق قۇجاتتارى ءقازىر مەملەكەتتىك ساراپتامادان ءوتىپ جاتىر. ساراپتامادان وتكەن سوڭ، قۇرىلىس جۇمىستارى مەملەكەتتىك بيۋدجەتتەن اقشا بولىنگەننەن كەيىن 2023 جىلى باستالادى. قۇرىلىس جۇمىسى قالالىق موبيلدىلىك باسقارماسىنىڭ كەلىسىمشارتى بويىنشا 1 جىل ۋاقىت جۇرگىزىلەدى»، – دەدى تۇركسىب اۋداندىق كورىكتەندىرۋ ءبولىمىنىڭ باس مامانى ساكەن باياسىل.
قازاقستان تەمىر جولى» ۇك» مالىمەتىنشە، الماتىدا بيىل جىل باسىنان بەرى شويىن جولدى دۇرىس وتپەگەنى ءۇشىن 7 ادامدى پويىز قاققان. ونىڭ بەسەۋى قايعىلى جاعدايمەن اياقتالدى.