الماتىنىڭ تۇركسىب اۋدانىنىڭ جولدارىندا بيىل 160 «سەرگەك» كامەراسى ورناتىلدى.
تۇركسىب اۋدانىنىڭ جول ينفراقۇرىلىمىن دامىتۋ، جولاۋشىلار تاسىمالىنىڭ ساپاسىن ارتتىرۋ جانە جول قاۋىپسىزدىگىن قامتاماسىز ەتۋ جۇمىستارى تۋرالى الماتى اكىمى ەربولات دوسايەۆ اۋدان تۇرعىندارىمەن كەزدەسۋ كەزىندە ايتتى، دەپ حابارلايدى aqshamnews.kz
قالا باسشىسىنىڭ ايتۋىنشا، بيىل قازان ايىنىڭ سوڭىنا دەيىن 39 كوشەدە 41،7 كم جولدىڭ ورتاشا جوندەۋ جۇمىستارى اياقتالادى. قازىرگى ۋاقىتتا 18 كوشەدە 30 كم جول جوندەلدى.
«اۋدانعا قوسىلعان شاعىن اۋدانداردىڭ جول ينفراقۇرىلىمىن دامىتۋعا ەرەكشە نازار اۋدارىلۋدا. ماسەلەن، «المەرەك» جانە «قايرات» شاعىن اۋداندارىندا 13 كوشەدە 13 كم جاڭا جول سالىنىپ جاتىر. بۇگىنگى كۇنگە دەيىن 5 كوشەدە 5،3 كم جول سالۋ جۇمىستارى اياقتالدى. سونىمەن قاتار، قازان ايىنىڭ سوڭىنا دەيىن «جاس قانات» شاعىن اۋدانىندا 19 كوشەدە 2،5 كم جول سالۋ جۇمىستارىن باستاۋ جوسپارلانۋدا. جۇمىستاردى 2025 جىلدىڭ 2-توقسانىندا اياقتاۋ جوسپارلانعان»، – دەدى ەربولات دوسايەۆ.
كەزدەسۋ بارىسىندا قالا اكىمى اۋداننىڭ جول قاۋىپسىزدىگىن قامتاماسىز ەتۋ بويىنشا اتقارىلىپ جاتقان جۇمىستارعا دا نازار اۋداردى.
مىسالى، بيىل قوسىمشا 160 «سەرگەك» كامەراسى ورناتىلدى. سونىڭ ناتيجەسىندە اۋدانداعى كامەرالاردىڭ جالپى سانى 816-عا جەتىپ، جول قوزعالىسى ەرەجەلەرىن بۇزۋدىڭ الدىن الۋ مەن باقىلاۋدى كۇشەيتتى.
ەربولات دوسايەۆ سونداي-اق، بيىل تۇركسىب اۋدانى ارقىلى وتەتىن 10 مارشرۋتتا 195 اۆتوبۋستىڭ جاڭارتىلعانىن اتاپ ءوتتى. بۇل كۇتۋ ۋاقىتىن ورتا ەسەپپەن 15 مينۋتتان 7 مينۋتقا دەيىن قىسقارتۋعا مۇمكىندىك بەردى. جىل سوڭىنا دەيىن اۋدان اۋماعىندا 5 جاڭا قالا ماڭى مارشرۋتىن ىسكە قوسۋ جوسپارلانعان.
سونىمەن قاتار، جاڭا وقۋ جىلى باستالعالى بەرى «مەكتەپ اۆتوبۋسى» جوباسى اياسىندا اۋدانعا قوسىلعان اۆتوبۋستار سانى 8-دەن 25-كە دەيىن ۇلعايتىلدى، بۇل 8 مەكتەپتەن 2 مىڭنان استام وقۋشىنى تاسىمالداۋعا مۇمكىندىك بەردى.
ايتا كەتەيىك، مەكتەپ اۆتوبۋستارى الماتىدا 2023 جىلى اكىمدىك جوبالىق كەڭسەسىنىڭ اياسىندا، الىس ورنالاسقان مەكتەپتەردە وقيتىن كىشى جاستاعى وقۋشىلاردىڭ جايلىلىعى مەن قاۋىپسىزدىگىن قامتاماسىز ەتۋ ءۇشىن ىسكە قوسىلعان بولاتىن.