الماتىنىڭ تۇركسىب اۋدانىندا ەسكى تۇرعىن ءۇي قورىن جاڭارتۋ جۇمىستارى قارقىندى جۇرگىزىلۋدە. قالا اكىمى ەربولات دوسايەۆ اۋدان تۇرعىندارىمەن كەزدەسۋ بارىسىندا 1960 جىلعا دەيىن سالىنعان 586 ءۇيدىڭ جاڭارتىلاتىنىن حابارلادى.
«2030 جىلعا دەيىنگى تۇرعىن ءۇي قورىن جاڭارتۋدىڭ جاڭا باعدارلاماسى ازىرلەندى. بۇل باعدارلامادا كەشەندى جانە ورامدىق قۇرىلىس، ەسكى ۇيلەردىڭ مەنشىك يەلەرىنىڭ قۇقىقتارىن قورعاۋ جانە تۇرعىن ءۇي قورىن الەۋمەتتىك، ينجەنەرلىك جانە كولىك ينفراقۇرىلىمىن دامىتۋ ارقىلى جاڭارتۋ قاراستىرىلعان»، – دەدى ەربولات دوسايەۆ.
شىلدە ايىندا كاسسين كوشەسىندە 6 جاڭا ءۇيدىڭ قۇرىلىسى اياقتالدى، ال جىل سوڭىنا دەيىن ساۋرانبايەۆ كوشەسىندە تاعى 7 ءۇيدىڭ تۇرعىندارى قونىس اۋدارادى. سونىمەن قاتار، «التاي-2» شاعىن اۋدانىندا 6 ءۇي ساتىپ الىنىپ، ەكى توعىز قاباتتى ءۇيدىڭ قۇرىلىسى جۇرگىزىلۋدە.
الماتىنى دامىتۋ جانە ءتيىمدى باقىلاۋدى قامتاماسىز ەتۋ ءۇشىن جاڭا قالا قۇرىلىسى رەگلامەنتى، قۇرىلىس ەرەجەلەرى جانە تۇرعىن ءۇي قورىن جاڭارتۋ باعدارلاماسى ازىرلەندى. بۇل قۇجاتتار جىل سوڭىنا دەيىن ءماسليحات سەسسياسىندا بەكىتىلەدى.