الماتىنىڭ ءتورت اۋدانىندا قۋراعان ءشوپ ورتەندى

 الماتىنىڭ الاتاۋ، بوستاندىق، ناۋرىزباي، تۇركسىب اۋداندارىندا قۋراعان ءشوپ ورتەندى.

قالالىق توتەنشە جاعدايلار دەپارتامەنتىنىڭ مالىمەتىنشە، 23 ناۋرىزدا ءورت سوندىرۋشىلەر 8 ءورت وشاعىنا شىقتى. 

23 ناۋرىز ساعات 16:20-دان باستاپ تجد كۇشتەرى مەن قۇرالدارى بوستاندىق اۋدانىنداعى «ەرمەنساي» ىقشام اۋدانىنىڭ باقتىگەرەيەۆ كوشەسىندە ءورتتى ءسوندىرۋدىڭ جوعارى دارەجەسى بويىنشا جۇمىس ىستەدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«ءورت ءسوندىرۋ بريگاداسى بارعان كەزدە تاۋ بوكتەرىندە جالپى اۋماعى 2 گا جەردى قامتىعان قۇرعاق ءشوپتىڭ جانۋىن انىقتادى. جەل تۇرعاندىقتان، ءورتتىڭ بەتكەيلەردەگى تۇرعىن ۇيلەرگە قاراي تارالۋ ءقاۋپى تۋىندادى. ءورت اۆتوتەحنيكاسى تاۋعا شىعا الماعاندىقتان، قىزىل جالىندى قاراپايىم قۇرالمەن جانە اسپالى ءورت سوندىرگىشپەن اۋىزدىقتاۋعا تۋرا كەلدى. ءورت 18:31-دە تولىق جويىلدى. قابىلدانعان شارالاردىڭ ارقاسىندا ورتتەن ۇيلەر مەن الما باعىن قورعاۋعا قول جەتكىزىلدى»، - دەپ دەپ ءمالىم ەتتى دەپارتامەنتتەن.

ءورتتى سوندىرۋگە جەكە قۇرامنان 24 مامان جانە 5 تەحنيكا جۇمىلدىرىلدى.

«ءورت ءقاۋىپتى كەزەڭنىڭ باستالۋىنا بايلانىستى قالا تۇرعىندارى مەن قوناقتارىن اشىق وتتى پايدالانۋدان، وت جاعۋدان، تەمەكى شەگۋدەن جانە قۇرعاق ءشوپ پەن ورىلعان ءشوپتى ورتەۋدەن باس تارتۋدى سۇرايمىز. كىنالى ادامدار اكىمشىلىك، ال اۋىر زارداپتار تۋىنداعان جاعدايدا قىلمىستىق جاۋاپكەرشىلىككە تارتىلادى»، - دەپ ەسكە سالدى ۆەدومستۆو وكىلدەرى.