الماتى اكىمى ەربولات دوسايەۆ بەيىندى باسقارمالاردىڭ، توتەنشە جاعدايلار دەپارتامەنتى، جەر رەسۋرستارىن باسقارۋ دەپارتامەنتىنىڭ جانە ت.ب. قاتىسۋىمەن تاۋ بوكتەرىندەگى قۇرىلىستى رەتتەۋ ماسەلەسى بويىنشا كەڭەس وتكىزدى.
ەستەرىڭىزگە سالا كەتەيىك، الماتىدا ەربولات دوسايەۆتىڭ تاپسىرماسىمەن تاۋلى ايماقتارى جانە تاۋ بوكتەرىندەگى قۇرىلىستى باقىلاۋ كۇشەيتىلدى. 2022 جىلى ماۋسىمدا ءماسليحات ەڭىسى 15 گرادۋستان اساتىن بەتكەيدە قۇرىلىسقا تىيىم سالاتىن اۋماقتىڭ فۋنكسيونالدىق ايماقتارىن سالۋدىڭ قالا قۇرىلىستىق رەگلامەنتتەرىن ىسكە اسىرۋ جوسپارىندا اكىمدىك باستاماشىلىق ەتكەن وزگەرىستەردى بەكىتتى.
قابىلدانعان وزگەرىستەر الماتى قالاسىنىڭ 2040 جىلعا دەيىنگى باس جوسپارىندا جانە ەگجەي-تەگجەيلى جوسپارلاۋدىڭ جاڭا جوبالارىندا كورىنىس تاپتى، قالا تۇرعىندارى جانە ساراپشىلاردىڭ قوعامدىق تالقىلاۋ قورىتىندىسى بويىنشا وعان ءبىرقاتار ۇسىنىس ەنگىزىلدى. سونىڭ ءبىرى تاۋ بوكتەرىندەگى 4 270 گەكتاردان استام جەردى قۇرىلىسقا تىيىم سالۋ ءۇشىن رەكرەاسيالىق ايماقتارعا اۋىستىرۋ.
قالا قۇرىلىسى جانە ۋربانيستيكا باسقارماسى حالىقتىڭ وتىنىشىمەن تاۋ بوكتەرىندەگى نىسانداردى جوبالاۋعا توپىراقتىڭ ينجەنەرلىك-گەولوگيالىق ىزدەستىرۋ كەزىندە باستاپقى دەرەكتەردى بەرەدى. الماتى قالاسى قالا قۇرىلىسىن باقىلاۋ باسقارماسىنىڭ مالىمەتىنشە، 2022 جىلى 36 نىسان، 2023 جىلى – 89 جانە بيىل 32 نىسان سالۋعا رۇقسات بەرىلمەگەن.
بۇل رەتتە، كەڭەسكە قاتىسۋشىلار اتاپ وتكەندەي، بۇگىندە بارلىق قۇرىلىس سالۋشى جوبالىق شەشىمدەردى ساقتامايدى. تاجىريبە كورسەتكەندەي، كەيبىرەۋلەر تەك رۇقسات قۇجاتتاماسىن الۋ ءۇشىن ينجەنەرلىك-گەولوگيالىق توپىراقتى ىزدەستىرۋدى جۇرگىزەدى. تاۋلى جەرلەردە زاڭسىز قۇرىلىس جۇرگىزگەن 54 فاكتىسىنىڭ 46-سى سوتقا بەرىلدى، ونىڭ 30-ى قالانىڭ پايداسىنا شەشىلدى، بۇگىندە ونىڭ 5-ىندە نىساندار بۇزىلدى.
كەڭەس قورىتىندىسى بويىنشا قالا اكىمى ەربولات دوسايەۆ ساۋلەت جانە قالا قۇرىلىسىن قاداعالاۋ ورگاندارىنا، اۋدان اكىمدىكتەرىنە تاۋ بوكتەرىندەگى اۋماقتاردا ءوز بەتىنشە قۇرىلىس سالۋعا تۇراقتى تۇردە مونيتورينگ جۇرگىزۋدى تاپسىردى. سونداي-اق مەملەكەت باسشىسىنىڭ تاپسىرماسىمەن ازىرلەنىپ جاتقان ق ر قۇرىلىس كودەكسىنە جەكە تۇرعىن ۇيلەر قۇرىلىسىنىڭ بارىسىن تەكسەرۋ مۇمكىندىگى بولىگىندە قالا قۇرىلىسىن باقىلاۋ ورگاندارىنىڭ وكىلەتتىگىن كۇشەيتۋ جونىندە ۇسىنىس ەنگىزىلسىن. جەر رەسۋرستارىن باسقارۋ دەپارتامەنتى – جەر زاڭناماسىنىڭ ساقتالۋى ءۇشىن جەر تەلىمدەرىنە تەكسەرۋلەر جۇرگىزسىن.