جىلجىمايتىن مۇلىكتى ساتىپ الماس بۇرىن قۇجاتتارىنىڭ بار-جوعىن تەكسەرۋ قاجەت.
الماتى اكىمدىگى پاتەر ساتىپ الۋعا ۇسىنىلمايتىن تاعى ەكى تۇرعىن ءۇي كەشەنىن اتادى، دەپ حابارلايدى Almaty-akshamy.kz
الماتى قالاسىنىڭ قالا قۇرىلىسىن باقىلاۋ دەپارتامەنتى ينتەرنەت-رەسۋرستارعا مونيتورينگ جۇرگىزۋ بارىسىندا قۇرىلىسقا قاجەتتى رۇقساتى جوق تۇرعىن ءۇي كەشەندەرىندەگى پاتەرلەردىڭ ساتىلاتىنى تۋرالى حابارلاندىرۋلاردى انىقتاعان.
"Auezov Apartaments" تك - المالى اۋدانى، قاراساي باتىر كوشەسى، 183/19. تاپسىرىس بەرۋشى Garant LTD Service ج ش س.
"2021 جىلعى 30 ساۋىردە تاپسىرىس بەرۋشى تاراپىنان Garant LTD Service ج ش س جوعارىدا كورسەتىلگەن مەكەنجاي بويىنشا قولدانىستاعى عيماراتتاردى قايتا جاڭارتۋعا جانە قولدانىستاعى قۇرىلىستاردى بۇزا وتىرىپ، قىزمەت كورسەتۋ وبەكتىلەرى بار اكىمشىلىك عيماراتتىڭ قوسىمشا قۇرىلىسىن سالۋعا حابارلاما بەردى. الايدا، جىلجىمايتىن مۇلىكتى ساتۋ سايتتارىندا كورسەتىلگەن مەكەنجاي بويىنشا پاتەرلەردىڭ جارناماسى ورنالاستىرىلعان، بۇل قولدا بار قۇجاتتارعا سايكەس كەلمەيدى"، - دەلىنگەن حابارلامادا.
Tole bi Residence تك - المالى اۋدانى، انوسوۆ كوشەسى، 103 "ب". تاپسىرىس بەرۋشى Adal سity Stroy ج ش س.
حابارلاماداعى اقپاراتقا سايكەس، 1-بلوك قۇرىلىسىنىڭ 1-كەزەگى 2023 جىلدىڭ 4-توقسانىندا پايدالانۋعا بەرىلەدى.
الايدا، بۇگىنگى كۇنى جوعارىدا اتالعان وبەكت بويىنشا قۇرىلىس-مونتاج جۇمىستارىن جۇرگىزۋدىڭ باستالعانى تۋرالى حابارلاما تۇسكەن جوق جانە قۇرىلىس-مونتاج جۇمىستارى جۇرگىزىلمەگەن.
"الماتىلىقتارعا جىلجىمايتىن مۇلىكتى ساتىپ الماس بۇرىن سالىنىپ جاتقان تۇرعىن ءۇي كەشەنى قۇجاتتارىنىڭ بار-جوعىن تەكسەرۋ قاجەت ەكەنىن ەسكە سالامىز، مۇنى الماتى قالاسى قالا قۇرىلىسىن باقىلاۋ باسقارماسىنىڭ +7 (727) 229-81-36 جەدەل جەلىسىنىڭ ءنومىرى بويىنشا جاساۋعا بولادى"،- دەلىنگەن اكىمدىك تاراتقان اقپاراتتا.