الماتىدا قالانى ۇزدىكسىز سۋمەن قامتاماسىز ەتۋ بويىنشا شارالار بەلسەندى قابىلدانىپ جاتىر، دەپ حابارلادى مەگاپوليستىڭ ەنەرگەتيكا جانە سۋمەن جابدىقتاۋ باسقارماسى.
بيىل 17 مامىردا «بالقاش» تازا سۋ رەزەرۆۋارى پايدالانۋعا بەرىلدى. جوبا اياسىندا 6،9 مىڭ تەكشە مەترگە 5 رەزەرۆۋار جانە تاۋلىگىنە 7،3 مىڭ تەكشە مەترگە 3 ۇڭعىما سالىندى. وسى جىلدىڭ 1 ماۋسىمىنان باستاپ يۋبيلەينىي، كامەنسك ءۇستىرتى، كولساي، مۇزتاۋ شاعىن اۋدان تۇرعىندارىن سۋمەن قامتاماسىز ەتۋ ءۇشىن رەزەرۆۋارعا 6،1 كم جاڭا ماگيسترالدىق جەلى سالىندى.
بىلتىر جەلتوقساندا قۋاتى تاۋلىگىنە 15 مىڭ تەكشە مەتر بولاتىن «قارعالى» سۋ جيناعىشىنىڭ قۇرىلىسى اياقتالدى. 1 ماۋسىمدا قولدانىستاعى جەلىلەر ارقىلى سۋ بەرىلە باستادى. سونداي-اق، 6،5 كم كارىز كوللەكتورىنىڭ قۇرىلىسى جۇرگىزىلىپ جاتىر. نىسان بيىل قىركۇيەك ايىندا اياقتالادى.
«اقساي» سۋ جيناعىشىنىڭ قۇرىلىسى بەلسەندى جۇرگىزىلىپ جاتىر. ونىڭ قۋاتى تاۋلىگىنە 22 مىڭ تەكشە مەتر. قازىرگى تاڭدا نىساننىڭ دايىندىعى 50%. قۇرىلىس-مونتاجداۋ جۇمىستارىن اياقتاۋ 2025 جىلدىڭ قاراشا ايىنا جوسپارلانعان.
«قارعالى»، «اقساي» جانە «بالقاش» تسر سۋ جيناعىشتارى قالانىڭ ناۋرىزباي جانە مەدەۋ اۋدانىنىڭ 170 مىڭ تۇرعىنىن، سونداي-اق الماتى وبلىسىنىڭ جاڭاتۇرمىس جانە قىرعاۋىلدى اۋىلدارىنىڭ 40 مىڭ تۇرعىنىن تۇراقتى سۋمەن قامتاماسىز ەتەدى.
الماتىنىڭ جوعارعى بولىگىنىڭ تۇرعىندارىن سۋمەن تۇراقتى قامتاماسىز ەتۋ ءۇشىن وسى جىلدىڭ اقپان ايىندا تاۋلىگىنە 32 مىڭ تەكشە مەتر سۋمەن جابدىقتاۋدىڭ رەزەرۆتىك سحەماسىن سالۋ جونىندەگى جوبانى ىسكە اسىرۋ باستالدى. قازىرگى تاڭدا 6 ۇڭعىمانى بۇرعىلاۋ جۇمىستارى جۇرگىزىلىپ جاتىر، ولار ءۇشىن 6 بىرلىك تەرەڭدىك سورعىلارى ساتىپ الىندى. الاڭداردا نەگىزگى سورعى جابدىقتارى ورناتىلادى. رەزەرۆتىك سحەمانىڭ قۇرىلىسىن 2024 جىلدىڭ 1 شىلدەسىنە دەيىن اياقتاۋ جوسپارلانعان. بۇل الماتىنىڭ جوعارعى بولىگىنىڭ 50 مىڭ تۇرعىنىن ۇزدىكسىز سۋمەن قامتاماسىز ەتۋگە مۇمكىندىك بەرەدى.