الماتىنىڭ ورتالىعىندا جۋرناليستەر سكۆەرى قايتا جاڭعىرتىلدى

الماتىدا كوپتەگەن تۇرعىننىڭ سۇيىكتى ورنىنا اينالعان ق ر ورتالىق مەملەكەتتىك مۋزەيىنىڭ جانىنداعى جۋرناليستەر سكۆەرىن رەكونسترۋكسيالاۋ اياقتالدى. 

سكۆەر اۋماعى 1،3 گا، دەنى جاسىل جەلەكتەرمەن جانە گۇلزارلارمەن كومكەرىلگەن. ساياباق ايماعىنىڭ ورتالىعىنداعى ايگىلى كومپوزيتور نۇرعيسا تىلەندييەۆتىڭ ەسكەرتكىشىنىڭ اينالاسىندا جان-جاققا باستايتىن 9 سوقپاق جول بار، دەپ حابارلايدى Almaty-akshamy.kz.

1997 جىلى سالىنعان سكۆەر جاڭارتۋدى قاجەت ەتكەن، سەبەبى بۇعان دەيىن جوندەۋ جۇمىستارى جۇرگىزىلمەگەن. سوقپاق جولداردىڭ جابىنى بۇزىلعان ەدى. ەسكەرتكىشتىڭ اينالاسىنداعى اۋماقتىڭ دا جابىنىن اۋىستىرۋ قاجەت بولاتىن. ورىندىقتار مەن قوقىس جاشىكتەرى جارامسىز بولىپ، اۋماقتى كوگالداندىرۋدى جاڭارتۋ قاجەتتىگى تۋىنداعان.

رەكونسترۋكسيا اياسىندا كەسپە تاس توسەۋ، جيەكتاستاردى مونتاجداۋ جۇمىستارى جۇرگىزىلدى، 12 جاڭا ورىندىق پەن 14 قوقىس جاشىگى ورناتىلدى، 3،8 مىڭ بۇتا مەن 10 تۋيا اعاشى وتىرعىزىلدى. سونىمەن قاتار، مەڭدىقۇلوۆ كوشەسىنە قاراي قوسىمشا جاياۋ جۇرگىنشىلەر جولى قۇرىلدى. 

بۇگىندە بۇل جاياۋ سەرۋەندەۋگە، كوككە شىعۋعا جانە بالالارمەن دەمالۋعا ىڭعايلى جاڭارتىلعان سكۆەر.