2025 جىلدىڭ قاڭتار-قازان ارالىعىندا الماتىنىڭ ونەركاسىپتىك ءوندىرىس كولەمى 1 944،2 ملرد تەڭگەگە جەتىپ، 12،3%-عا ارتتى. وڭدەۋ ونەركاسىبى 13،7%-عا ءوسىپ، جالپى ونەركاسىپتىك شىعارىلىمنىڭ 84،5%-دان استامىن قامتاماسىز ەتتى. بۇل تۋرالى الماتى قالاسىنىڭ كاسىپكەرلىك جانە ينۆەستيسيالار باسقارماسىنىڭ وكىلدەرى حابارلادى.
اسىرەسە، ماشينا جاساۋ، مينەرالدىق ءونىم، سۋسىن، قاعاز بۇيىمدارى، حيميالىق جانە فارماسيەۆتيكالىق ءونىم، سونداي-اق توقىما، كيىم جانە اعاشتان جاسالعان بۇيىم وندىرىسىندە جوعارى ءوسىم بايقالادى.
سەكتورداعى ءوسىم قالانىڭ ءىرى جانە ورتا ونەركاسىپتىك الاڭدارىنداعى ءونىم ءوندىرۋ كولەمىنىڭ ارتۋىمەن قامتاماسىز ەتىلدى. بۇعان ديلەرلەر، قۇرىلىس كومپانيالارى جانە ساۋدا جەلىلەرى تاراپىنان تاپسىرىستىڭ كوبەيۋى دە ىقپال ەتتى.
جىل باسىنان بەرى يندۋستريالىق ايماقتا جانە «يننوۆاسيالىق تەحنولوگيالار پاركى» ارنايى ەكونوميكالىق ايماعىندا جالپى قۇنى 225،3 ملرد تەڭگە بولاتىن 8 جوبا ىسكە قوسىلدى. جىل سوڭىنا دەيىن 80،2 ملرد تەڭگە كولەمىندەگى تاعى 10 جوبانى ەنگىزۋ جوسپارلانىپ وتىر.
يندۋستريالىق ايماق اۋماعىندا جالپى قۇنى 655،8 ملرد تەڭگە بولاتىن جانە ونداعان مىڭ جۇمىس ورنىن قۇرعان جۇزدەن استام كاسىپورىن جۇمىس ىستەيدى. بيىل جاڭا نىساندار پايدالانۋعا بەرىلىپ، 3 مىڭنان استام جۇمىس ورنى اشىلدى، سونداي-اق شاعىن ونەركاسىپتىك پاركتەر ىسكە قوسىلدى.
«يننوۆاسيالىق تەحنولوگيالار پاركى» ارنايى ەكونوميكالىق ايماق اۋماعىندا سيفرلىق تەحنولوگيا، كۇن پانەلدەرى جانە مەديسينالىق جابدىق ءوندىرۋ سالالارىندا جوبالار جۇزەگە اسىرىلدى. جىل سوڭىنا دەيىن تاعى ەكى جاڭا ينۆەستيسيالىق جوبانى ىسكە قوسۋ كوزدەلگەن.
قازىرگى كەزدە «يننوۆاسيالىق تەحنولوگيالار پاركى» ارنايى ەكونوميكالىق ايماعىندا 193 قاتىسۋشىسى تىركەلگەن (ونىڭ ىشىندە 126 قاتىسۋشى ەكستەرريتوريالدى قىزمەت اتقارادى). سالىنعان ينۆەستيسيا كولەمى 258 ملرد تەڭگەگە، تاۋار، جۇمىس جانە قىزمەت ءوندىرىسىنىڭ كولەمى 1 ترلن تەڭگەگە جەتتى. ەكسپورت كولەمى 17،8 ملرد تەڭگە، سالىق ءتۇسىمى 72 ملرد تەڭگە، 6 974 جۇمىس ورنى اشىلدى.