الماتى قالاسى ناۋرىزباي اۋدانىندا جاڭا مەكتەپتەر مەن بالاباقشالاردىڭ قۇرىلىسى قارقىندى جۇرگىزىلىپ وتىر.
بۇل وقۋشى ورىندارىنىڭ تاپشىلىعىن ازايتۋعا، ءبىلىم بەرۋ سالاسىنىڭ جاعدايىن جاقسارتۋعا مۇمكىندىك بەرەدى، دەپ حابارلايدى Almaty-akshamy.kz.
«جايلى مەكتەپ» ۇلتتىق جوباسى اياسىندا «Qazaq stroy» ج ش س قۇرىلىس كومپانياسى 2400 ورىندىق ەكى جاڭا مەكتەپتىڭ قۇرىلىسىن قولعا العان. ەكى مەكتەپتىڭ ءبىرى «Alem city» تۇك اۋماعىندا ورنالاسقان. قۇرىلىس جۇمىستارى 2024 جىلدىڭ ءبىرىنشى توقسانىندا اياقتالادى. ەكىنشى مەكتەپ «الما سيتي-4» تۇرعىن ءۇي كەشەنى، الاتاۋ داڭعىلىنىڭ بويىنا سالىنادى. جوسپار بويىنشا قۇرىلىس-مونتاج جۇمىستارى 2024 جىلدىڭ ءتورتىنشى توقسانىندا اياقتالادى.
سونىمەن قاتار، 2023 جىلدىڭ قىركۇيەك ايىندا «قۇرامىس»، «شۇعىلا» شاعىن اۋداندارىندا («نۇرلى دالا» تۇك) جانە سابدەنوۆ كوشەسىندە 5500 وقۋشىعا ارنالعان ءۇش قوسىمشا مەكتەپتىڭ قۇرىلىس جۇمىستارى باستالدى. بۇل جوبالاردىڭ مەردىگەرى «Samruk-Kazyna Construction» اق.
ءبىلىم بەرۋ ينفراقۇرىلىمىن جاقسارتۋ ماقساتىندا ءبىلىم باسقارماسى 375 وقۋشىعا ارنالعان №174 مەكتەپ-گيمنازيا عيماراتىنا قوسالقى عيمارات قۇرىلىسىن سالۋ بويىنشا جوبا ازىرلەدى. قۇرىلىس جۇمىستارى وسى جىلدىڭ قاراشا ايىندا باستالۋعا ءتيىس.
بۇعان قوسا، «شۇعىلا» شاعىن اۋدانىندا 320 ورىندىق بالاباقشا سالىنىپ جاتىر. مەردىگەر كومپانيا «استانا ستروي ينۆەست» ج ش س بۇل جۇمىستى 2023 جىلدىڭ سوڭىنا دەيىن اياقتاۋدى جوسپارلاپ وتىر.
2024 جىلعا جوسپارلانعان جوبالار:
1. «شۇعىلا» ش/ا («نۇرلى دالا» تۇك) – 320 ورىندىق بالاباقشا؛
2. «قۇرامىس» ش/ا – 320 ورىندىق بالاباقشا؛
3. «قالقامان-2» ش/ا – 240 ورىندىق بالاباقشا؛
ءارى «شۇعىلا» شاعىن اۋدانىندا 320 ورىندىق بالاباقشانىڭ جوبالاۋ-سمەتالىق قۇجاتتاماسى ازىرلەنىپ جاتىر. قۇرىلىس جۇمىستارى 2024 جىلدىڭ ءۇشىنشى توقسانىندا باستالادى.
مەكتەپتەر مەن بالاباقشالار – ءبىلىم بەرۋ ينفراقۇرىلىمىن دامىتۋعا جانە بالالاردى وقىتۋعا قولايلى جاعداي جاساۋداعى ماڭىزدى قادام.