ناۋرىزباي اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ جول جانە كولىك ينفراقۇرىلىمىن دامىتۋ جۇمىستارى تۋرالى ايتىپ بەردى، دەپ حابارلايدى aqshamnews.kz
قالا باسشىسى 2024 جىلى 21 كوشەدە 14،5 شاقىرىم جولعا ورتاشا جوندەۋ جۇرگىزىلگەنىن، ال اعىمداعى جىلى 35 كوشەدە تاعى 47 شاقىرىم جولدى قامتۋ جوسپارلانعانىن ايتتى.
كوشە-جول جەلىسىنىڭ ساپاسىن ارتتىرۋ ءۇشىن 2024 جىلى اۋداندا 50 مىڭ شارشى مەتر جول جابىنى قالپىنا كەلتىرىلىپ، 1،7 كم ارىق جەلىلەرى سالىندى. بيىل تاعى 45 مىڭ شارشى مەتر جول توسەمىن جوندەۋ، 8،8 شاقىرىم تروتۋارلاردى جابدىقتاۋ جانە 4 كوشەدە 5 شاقىرىمعا جۋىق ارىق جەلىلەرىن سالۋ جوسپارلانۋدا.
سونىمەن قاتار، 2024 جىلى اقجار ش/ا-دا 6 كم جاڭا جول سالىندى. 2025 جىلدىڭ مامىر ايىندا اقجار جانە شۇعىلا شاعىن اۋداندارىندا تاعى 20 كم جاڭا جول قۇرىلىسى باستالادى، وندا وتكەن جىلى ينجەنەرلىك جەلىلەردى سالۋ جۇمىستارى اياقتالدى.
«اۋداندا ماگيسترالدىق كوشەلەردى ۇزارتۋ جۇمىستارى بەلسەندى جۇرگىزىلۋدە. اباي داڭعىلىن سترويتەلنايا كوشەسىنەن التىن وردا كوشەسىنە دەيىن ۇزارتۋ جالعاسۋدا، جوبانىڭ تولىق اياقتالۋى مامىر ايىنىڭ سوڭىنا كۇتىلۋدە. تولە بي كوشەسىن ۇزارتۋ بويىنشا 270 جەر ۋچاسكەسىنەن 211 جەر ساتىپ الىندى، جوبانى اعىمداعى جىلدىڭ سوڭىنا دەيىن اياقتاۋ جوسپارلانۋدا. جۇبانوۆ كوشەسىنە كەلەتىن بولساق، 346 ۋچاسكەنىڭ 75 - ءى ساتىپ الىندى، كوشەنى ۇزارتۋ اياسىندا جول قۇرىلىسىن 2026 جىلدىڭ قاراشا ايىندا اياقتاۋ جوسپارلانۋدا»، - دەپ اتاپ ءوتتى ەربولات دوسايەۆ.
كەزدەسۋ بارىسىندا الماتى اكىمى اۋداندا قوعامدىق كولىك قىزمەتتەرىنىڭ ساپاسىن ارتتىرۋ بويىنشا جۇرگىزىلىپ جاتقان جۇمىستار تۋرالى دا حاباردار ەتتى. 2024 جىلى جىلجىمالى قۇرام 577-دەن 794 اۆتوبۋسقا دەيىن ۇلعايتىلدى، بۇل 10 جاڭا مارشرۋتتى ۇيىمداستىرۋعا، 20 قولدانىستاعى مارشرۋتتى جاڭارتۋعا جانە كۇشەيتۋگە مۇمكىندىك بەردى. جاڭا قۇرىلىس ورىندارىندا جانە ايالداماسىز ۋچاسكەلەردە 17 جاڭا ايالداما كەشەنى ورناتىلدى.