وكق بريفينگىنە قاتىسقان ناۋرىزباي اۋدانىنىڭ اكىمى نازيرا توعىزبايەۆا جول ينفراقۇرىلىمىنىڭ دامۋى تۋرالى ايتتى، دەپ حابارلايدى اlmaty-akshamy.kz.
ناۋرىزباي اۋدانىندا جالپى ۇزىندىعى 298 شاقىرىم 348 كوشە بار، اسفالتتالعان جولداردىڭ ۇلەسى – 87% قۇرايدى.
«اقجار شاعىن اۋدانىندا جالپى ۇزىندىعى 45،3 شاقىرىم 89 كوشەدە جول سالۋ جوسپارلانعان. بۇگىنگى تاڭدا جول قۇرىلىسىمەن 15 شاقىرىم قامتىلعان. قالعان كوشەلەر نەمەسە 30 شاقىرىم ينجەنەرلىك جەلىلەر قۇرىلىسى اياقتالعاننان كەيىن اسفالتتالاتىن بولادى»، - دەدى اۋدان باسشىسى.
سونىمەن قاتار، شۇعىلا شاعىن اۋدانى بويىنشا ۇزىندىعى 6،8 شاقىرىم 13 كوشەدە جول سالۋ جوسپارلانعان. بيىل ۇزىندىعى 5 شاقىرىم 9 كوشە قۇرىلىسپەن قامتىلدى، قالعان 4 كوشە 2024 جىلى اياقتالادى دەپ جوسپارلانۋدا.
سونىمەن قاتار، شۇعىلا، راحات، تاۋسامالى، قالقامان شاعىن اۋداندارىندا، جالپى ۇزىندىعى 15 شاقىرىم 16 كوشەدە جولدارعا ورتاشا جوندەۋ جۇرگىزىلدى. وسىعان ۇقساس جۇمىستاردى جۇرگىزۋ ءۇشىن 2024 جىلى قالالىق موبيلدىلىك باسقارماسىنا ۇزىندىعى 40 شاقىرىم 38 كوشەنى ورتاشا جوندەۋگە ءوتىنىم جولداندى.
وسى جىلدىڭ باسىنان بەرى شۇڭقىرلاردى جوندەۋ جۇمىستارى جۇرگىزىلدى، ناتيجەسىندە 170 كوشەدە 45 مىڭ م2 جول جوندەلدى. تەحنيكالىق تروتۋارمەن كولەمى 8 مىڭ م2 اساتىن 11 كوشە قامتاماسىز ەتىلگەن.