الماتى قالاسى مەدەۋ اۋدانىنىڭ اكىمى اسەت ماسابايەۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا وسى ماقساتتا جاسالىپ جاتقان جۇمىستار مەن باسقا دا الەۋمەتتىك نىسانداردىڭ اشىلۋى تۋرالى ايتىپ بەردى، دەپ حابارلايدى اlmaty-akshamy.kz
سپيكەر اتاپ وتكەندەي، اۋداندا جالپى 33 079 وقۋشىنى قامتيتىن 28 مەملەكەتتىك جانە 19 جەكەمەنشىك مەكتەپ جۇمىس ىستەيدى. بۇل رەتتە تاپشىلىق 4500 ورىندى قۇرايدى.
«بۇل ماسەلەنى شەشۋ ءۇشىن 300 ورىندى قوسىمشا قۇرىلىسى بار №48 مەكتەپ عيماراتىنا كۇردەلى جوندەۋ جۇرگىزىلۋدە. جۇمىستى 2022 جىلى اياقتاۋدى جوسپارلاپ وتىرمىز. الاتاۋ شاعىن اۋدانىنداعى №7 مەكتەپتىڭ سەيسميكالىق كۇشەيتىلۋىمەن كۇردەلى جوندەۋ اياقتالدى»، - دەدى اسەت ماسابايەۆ.
سونداي-اق، جەكە ينۆەستورلار ەسەبىنەن جالپى 602 ورىنعا ارنالعان Prime School، Global Education جانە EPG Prometheus School سياقتى 3 جەكەمەنشىك مەكتەپ سالىنىپ، پايدالانۋعا بەرىلگەنى بەلگىلى بولدى. وسى جوبالاردى ىسكە اسىرۋ اۋداننىڭ ورتالىق بولىگىندە وقۋشى ورىندارىنىڭ تاپشىلىعىن 30%-عا تومەندەتۋگە مۇمكىندىك بەردى.
سونىمەن قاتار، "الاتاۋ" شاعىناۋدانىندا دەنە شىنىقتىرۋ-ساۋىقتىرۋ كەشەنىنىڭ قۇرىلىسى جالعاسۋدا. جوسپاردا 5 جولعا ارنالعان ءجۇزۋ باسسەينى، بالالار باسسەينى، ترەناجەر زالى جانە تەننيس ۇستەلدەرى قاراستىرىلعان.
مەكتەپكە دەيىنگى ءبىلىم بەرۋ ۇيىمدارىنىڭ جەلىسى دە كەڭەيۋدە. بۇگىندە اۋداندا 18 بالاباقشا مەن 82 جەكەمەنشىك بالاباقشا بار. تاربيەلەنۋشىلەردىڭ جالپى سانى - 6001. 2021 جىلدىڭ باسىنان بەرى جەكە ينۆەستورلار ەسەبىنەن 306 ورىندى 6 بالاباقشا اشىلدى. بيىل №141 بالاباقشادا كۇردەلى جوندەۋ اياقتالدى. №114، 116 بالاباقشالاردا قايتا جاڭعىرتۋ جۇمىستارى جۇرگىزىلۋدە. بۇل جوبالىق قۋاتتىلىقتى ءاربىر بالاباقشادا 50 ورىنعا ارتتىرۋعا مۇمكىندىك بەرەدى.
سونىمەن قاتار، مەدەۋ اۋدانى اكىمىنىڭ ايتۋىنشا، "كەڭساي" شاعىناۋدانىندا جالپى اۋدانى 166،8 شارشى مەتر بولاتىن جاڭا دارىگەرلىك امبۋلاتوريا اشۋ جوسپارلانعان. بۇل جوبانى ىسكە اسىرۋ "كەڭساي" ءماسسيۆىنىڭ عانا ەمەس، "سۇلۋساي" شاعىناۋدانىنىڭ تۇرعىندارىن دا قامتۋعا مۇمكىندىك بەرەدى. اشۋدىڭ جوسپارلى مەرزىمى – 2022 جىل.
"دۋمان" شاعىناۋدانىندا ءبىر اۋىسىمدا 200 ادام قابىلدايتىن وتباسىلىق-دارىگەرلىك امبۋلاتوريا اشۋ بويىنشا جۇمىستار جۇرگىزىلۋدە. قۇلجا تاس جولىنىڭ بويىندا ەرەسەكتەرگە ارنالعان 250 توسەكتىك ونكولوگيالىق ورتالىق جانە جيتس ورتالىعىنىڭ بولىمشەسى بار حوسپيس سالۋ جوسپارلانعان.