ەرتەڭ الماتىدا قالىڭ قار جاۋادى دەگەن بولجام بار.
وسىعان بايلانىستى الماتىنىڭ كوممۋنالدىق قىزمەتى كۇشەيتىلگەن جۇمىس رەجيمىنە كوشتى، دەپ حابارلايدى aqshamnews.kz.
«قازگيدرومەت» رمك-نىڭ مالىمەتىنشە، 8 قاڭتار كۇنى تۇندە جانە تاڭەرتەڭ قالادا قاردىڭ قالىڭدىعى 9 مم-گە دەيىن جەتىپ، كوكتايعاق بولۋى مۇمكىن. اۋا تەمپەراتۋراسى تۇندە -5…-7 °س-قا دەيىن تومەندەپ، كۇندىز -2…0 °س شاماسىندا بولادى.
7 قاڭتار كۇنى قار كۇرەۋ جۇمىستارىنا 438 ارنايى تەحنيكا مەن 968 جۇمىسشى تارتىلدى. 2024-2025 جىلدارى قىسقى ماۋسىم باستالعالى بەرى 220 مىڭ م³ قار شىعارىلدى.
جولدى ۋاقىتىلى ءارى ءتيىمدى تازارتۋ ءۇشىن كوممۋنالدىق ينفراقۇرىلىمدى دامىتۋ باسقارماسى قالا تۇرعىندارىنا مىناداي ەسكەرتۋ جاسايدى:
• اۆتوكولىكتەردى، اسىرەسە تۇنگى ۋاقىتتا، جول جيەگىندە قويماۋعا.
• جولدار مەن اۆتوتۇراقتار بويىنا ورناتىلعان ەسكەرتۋ كونۋستارىنا نازار اۋدارۋعا.
قار شىعارۋ جۇمىستارى تاۋلى جانە تاۋ بوكتەرىندەگى اۋدانداردا ەرەكشە نازارعا الىنىپ، قار كۇرەۋ جۇمىستارى بەلسەندى جۇرگىزىلەدى.
كولىك جۇرگىزۋشىلەرى مەن جاياۋ جۇرگىنشىلەرگە ۇسىنىستار:
كوكتايعاققا بايلانىستى كولىك جۇرگىزۋشىلەرىنەن جىلدامدىق رەجيمى مەن كولىكتەر اراسىنداعى قاشىقتىقتى ساقتاۋ جانە قار شىعارۋ تەحنيكاسى جۇمىس ىستەپ جاتقان اۋماقتاردا كولىك قويماۋعا شاقىرادى.
جاياۋ جۇرگىنشىلەر جولدان وتكەندە، اسىرەسە كوشە دۇرىس كورىنبەي قالعان كەزدە جانە جول تايعاق بولعان جاعدايدا، اسا ساق بولعانى ءجون.