الماتىنىڭ قاۋىمداستىق-ورتالىقتارى جاستار، شىعارماشىلىق قاۋىمداستىقتار مەن بەلسەندى ازاماتتار ءۇشىن ناعىز تارتىمدىلىق نۇكتەسىنە اينالۋدا، دەپ حابارلادى قاۋىمداستىق-ورتالىقتار ديرەكسياسىنىڭ باسشىسى ديانا مالايەۆا وڭىرلىك كوممۋنيكاسيالار قىزمەتى مەن قالانىڭ جاستار ساياساتى باسقارماسى ۇيىمداستىرعان باسپا ءسوز تۋرى بارىسىندا.
«بۇل جاي عانا كەزدەسۋگە ارنالعان ورىن ەمەس - بۇل دامىتۋ، وقىتۋ جانە ءوزىن-وزى ىسكە اسىرۋ الاڭدارى. بۇل جەردە اركىم قولداۋعا يە بولا الادى، ول زاڭگەردىڭ كونسۋلتاسياسى بولسىن، ءبىلىم بەرۋ جوباسىنا قاتىسۋ بولسىن، ءتىپتى ءوزىنىڭ شىعارماشىلىق ستارتاپىن ىسكە قوسۋ بولسىن»، - دەپ اتاپ ءوتتى ول.
ونىڭ ايتۋىنشا، قاۋىمداستىق ورتالىقتارى زاماناۋي كوۆوركينگ ايماقتارىنا، جينالىس بولمەلەرىنە جانە ءتىپتى مۋزىكالىق ستۋديالارعا تەگىن قول جەتكىزۋگە مۇمكىندىك بەرەدى. ونلاين برونداۋ جۇيەسىنىڭ ارقاسىندا تۇرعىندار ءوز ءىس-شارالارى ءۇشىن ىڭعايلى ۋاقىت پەن ورىندى الدىن الا تاڭداي الادى.
ديانا مالايەۆا بۇگىنگى تاڭدا ءاربىر قاۋىمداستىق ورتالىعىندا رەزيدەنتتەردىڭ تۇراقتى شەڭبەرى-جۇمىس، وقۋ نەمەسە شىعارماشىلىق ءۇشىن كەڭىستىكتى پايدالاناتىن تۇراقتى كەلۋشىلەر قالىپتاسقانىن اتاپ ءوتتى. ماماننىڭ ايتۋىنشا، ءار ورتالىققا كۇن سايىن ورتا ەسەپپەن 100 ادام كەلەدى.
«بىزگە جاس كاسىپكەرلەر، فريلانسەرلەر، سەناريستەر، مۋزىكانتتار جۇمىس ىستەۋگە جانە ارالاسۋعا ىڭعايلى ورىن ىزدەۋشىلەردىڭ ءبارى كەلەدى. مىسالى، ورتالىقتاردىڭ بىرىندە رەزيدەنتتەر تانىمال سەريال ءۇشىن سەناريي جازسا، ەكىنشىسىندە ميلليوننان استام تىڭدالىم جيناعان مۋزىكالىق ترەك جازدى»، - دەدى ول.
ورتالىقتار جۇمىسىنىڭ تاعى ءبىر ماڭىزدى باعىتى، ديرەكسيا باسشىسىنىڭ ايتۋىنشا، جۇمىسقا ورنالاسۋعا كومەكتەسۋ بولىپ تابىلادى. ءاربىر ورتالىقتا جۇمىس ىزدەۋ، تۇيىندەمە جاساۋ جانە اڭگىمەلەسۋدەن ءوتۋ ماسەلەلەرى بويىنشا كەڭەس بەرەتىن مانساپ بويىنشا مامان جۇمىس ىستەيدى. بۇدان باسقا، ورتالىقتار بيزنەس-قوعامداستىقپەن بەلسەندى ءوزارا ءىس-قيمىل جاسايدى، بۇل قالالىقتار ءۇشىن جەدەل بوس جۇمىس ورىندارىن تابۋعا مۇمكىندىك بەرەدى.
ەسكە سالايىق، 2024 جىلى الماتى اكىمى ەربولات دوسايەۆتىڭ باستاماسىمەن سەگىز جاڭا ورتالىق اشىلدى، ال 2025 جىلى ولاردىڭ سانىن 16-عا دەيىن ارتتىرۋ جوسپارلانىپ وتىر.