قالالىق موبيلدىلىك باسقارماسىندا الماتىداعى قوعامدىق كولىكتىڭ تارتىمدىلىعىن قالاي ارتتىرۋ كەرەكتىگى ايتىلدى، دەپ حابارلايدى almaty-akshamy.kz
الماتىدا كولىك سانى تىم كوبەيىپ كەتتى. بۇگىندە قالا تۇرعىندارىنىڭ شامامەن 65%-ى جەكە كولىكپەن جۇرەدى. سالىستىرساق، ماسكەۋدە 30%، پاريجدە نەبارى 11%. ەكى جىل ىشىندە قالادا تىركەلگەن اۆتوكولىك سانى 24% ءوستى، 2030 جىلعا قاراي بۇل ءوسىم كەمىندە 40% بولادى.
ۇزىن-سونار كولىك كەپتەلىسى مەن سونىڭ سالدارىنان اۋانىڭ شامادان تىس لاستانۋ ماسەلەسىن شەشۋ ءۇشىن قالالىق موبيلدىلىك باسقارماسى 2030 جىلعا دەيىن كولىك قۇرىلىمىنىڭ شەبەر جوسپارى جوبانى جۇزەگە اسىرۋعا كىرىستى.
الماتىنىڭ 2030 جىلعا دەيىنگى دامۋ باعدارلاماسىنا سايكەس، مەگاپوليس پوليسەنتريستىك، ءقاۋىپسىز، ادامدار ءۇشىن «جاسىل قالا» بولۋعا ءتيىس. بۇل رەتتە، قوعامدىق كولىكتىڭ (قك) قولجەتىمدىلىگىن ارتتىرۋ جانە حالىقتى 100% قولجەتىمدى قوعامدىق كولىكپەن قامتاماسىز ەتەتىن ينفراقۇرىلىم قۇرۋ ماڭىزدى ءرول اتقارادى. قوعامدىق كولىكتەگى ساپار سانى 64% ارتادى، ال جەكە اۆتوكولىكتەردىڭ ۇلەسى ازايادى، سونىڭ ناتيجەسىندە تۇرعىندار جولعا قازىرگىدەن قاراعاندا ءۇش ەسە از ۋاقىت جۇمسايدى.
«بۇعان جەتۋ ءۇشىن ادامدار جەكە كولىكتەن قوعامدىق كولىككە اۋىسقىسى كەلەتىندەي جاعداي جاساۋ كەرەك. ازىرگە، بۇعان ءبىراز كەدەرگى بار. قالالىق موبيلدىلىك باسقارماسىنىڭ تاپسىرىسىمەن جۇرگىزىلگەن ساۋالناما بارىسىندا الماتىلىقتاردىڭ 42%-ى قوعامدىق كولىكتىڭ شامادان تىس جۇكتەلۋىنە، 41%-ى ۇزاق كۇتۋگە جانە ساعات 22:00-دەن كەيىن مارشرۋتتاردىڭ بولماۋىنا شاعىم تۇسىرگەن. رەسپوندەنتتەر جۇرگىزۋشىلەردىڭ كولىك جۇرگىزۋى مەن مىنەز-قۇلقىنا قاناعاتتانباعانىن، كەستەنىڭ ساقتالمايتىنىن جانە اۋىسىپ مىنۋگە تۋرا كەلەتىن اتاعان. بۇل جاعدايدى شەشۋ ءۇشىن اكىمدىك قالانىڭ كولىك قۇرىلىمىنىڭ شەبەر جوسپارىن بەكىتتى. 2030 جىلعا قاراي قالادا جالپى ۇزىندىعى 296 كم بولاتىن قوعامدىق كولىككە ارنالعان 42 جۇردەك ءدالىز قۇرىلادى دەپ جوسپارلانعان. جۇردەك اۆتوبۋستاردىڭ، تروللەيبۋستاردىڭ، جەڭىل رەلستى كولىكتەردىڭ جانە مەترو بەكەتتەرىنىڭ جاڭا باعىتتارى تۇرعىلىقتى اۋدانداردىڭ 75%-ىن جانە جۇمىس ورىندارىنىڭ 81% -ىن قامتۋعا مۇمكىندىك بەرەدى»، - دەپ اتاپ ءوتتى باسقارما باسشىسى ساعىندىق تەلىبايەۆ.
گازبەن جۇرەتىن اۆتوبۋستار مەن ەلەكترلى اۆتوبۋستاردى جولاۋشىلار تاسىمالىنا شىعارۋ، جاڭا ايالدامالار سالۋ جانە اسىرەسە، «قاربالاس ساتتە» جول ءجۇرۋ ارالىعىن قىسقارتۋ كوزدەلگەن.
شەبەر جوسپارعا سايكەس، قالاعا كىرەبەرىستە اۆتوتۇراقتار پايدا بولادى – بۇل ءۇشىن باتىس، سولتۇستىك جانە شىعىس باعىتتا ءۇش جاڭا كولىك-ترانسپلانتاسيالاۋ تورابى سالىنادى. قوعامدىق كولىكتىڭ قولجەتىمدىلىگىن ارتتىرۋ ءۇشىن قالادا تۇرعىن ۇيلەردەن ايالدامالارعا دەيىنگى جاياۋ جۇرگىنشىلەر مەن ۆەلوجولدار جابدىقتالادى.
الماتىنىڭ كولىك قۇرىلىمىنىڭ شەبەر جوسپارى ەنگىزىلىپ جاتىر: ونىڭ پيلوتتىق الاڭى رايىمبەك داڭعىلىنداعى اۋماق بولماق، وندا اۆتوبۋستارعا ارنالعان ۇزدىكسىز بولىنگەن جولاقتار پايدا بولىپ، تولىققاندى جاياۋ جۇرگىنشىلەر جانە ۆەلو ينفراقۇرىلىم قۇرىلادى. ەڭ پروبلەمالى جەرلەردە كامەرالار ورناتىلادى. سونىڭ ناتيجەسىندە بۇگىندە ۇنەمى كەپتەلىس بولاتىن داڭعىل زاماناۋي جۇردەك ماگيسترالعا اينالۋى كەرەك.
الماتىنىڭ كولىك قۇرىلىمىن سالۋ ناتيجەسىندە اۋىسىپ مىنۋگە، ايالدامالارعا بارۋعا، قوعامدىق كولىكتى كۇتۋ مەن جولعا كەتەتىن ۋاقىت قىسقارۋعا ءتيىس.