قازاقستان جازۋشىلار وداعىندا ۇلتتىق كىتاپ كۇنى اياسىندا، جىل سايىن ۇيىمداستىرىلاتىن «الماتىنىڭ جاس جازۋشىسى – 2025» قالالىق بايقاۋىنىڭ جەڭىمپازدارى ماراپاتتالدى.
قازاق تىلىندەگى شىعارمالار اراسىنان ۇزدىك دەپ تانىلعان شىعارما – اباي اتىنداعى دارىندى بالالارعا ارنالعان مەكتەپ-ينتەرناتىنىڭ وقۋشىسى شىرايلىم ايبەك قىزىنىڭ تۋىندىسى. ول ءوز اڭگىمەسىن ساپارعالي بەگاليننىڭ «الدانعان جولبارىس» اتتى شىعارماسىنىڭ نەگىزىندە جازعان.
ال ورىس تىلىندەگى جۇمىستاردىڭ ىشىندە ەڭ جوعارى باعانى №52 جالپى ءبىلىم بەرەتىن مەكتەپتىڭ وقۋشىسى رەنات بەككۋلوۆتىڭ «ۆولشەبنوە پۋتەشەستۆيە ۆ مير ساپارگالي بەگالينا» اتتى شىعارماسى يەلەندى.
– بيىلعى بايقاۋعا 15-17 جاس ارالىعىنداعى 173 وقۋشى قاتىستى. ولار ساپارعالي بەگالين شىعارمالارىنىڭ جەلىسى بويىنشا فەنتەزي جانرىنداعى تۋىندىلارىن قازاق جانە ورىس تىلدەرىندە ۇسىندى. بۇل بايقاۋ ءسوز قادىرىنە بويلاعان، كىتاپتى، رۋحانياتتى سۇيەتىن شىعارماشىل جەتكىنشەكتەردىڭ جولىن اشىپ، شابىت بەرەتىنى ءسوزسىز. مەرەيى ۇستەم بولعان جاستارعا ساتتىلىك تىلەيمىز، – دەدى الماتى كىتاپحانالارى ديرەكتورىنىڭ كىتاپحانا ىستەرى جونىندەگى ورىنباسارى ءلاززات سپاتايەۆا.
بايقاۋ اياسىندا ساراپشىلار كەڭەسىنىڭ جانە قازىلار القاسىنىڭ شەشىمىمەن 15 جاسقا دەيىنگى اۆتورلار ءۇشىن ارنايى «جاس دارىن – 2025» نوميناسياسى تاعايىندالدى. بۇل اتالىم بويىنشا 16 شىعارما ىرىكتەلىپ الىنىپ، اۆتورلار ىنتالاندىرۋ سىيلىقتارىمەن جانە ارنايى سەرتيفيكاتتارمەن ماراپاتتالدى.