28 تامىزدا پاش ەتپەك
مۋزىكالىق كەشتىڭ اۆتورى – جاھان جۇرتىنا جاقسى تانىس كومپوزيتور ءارى پيانيست راحات – بي ءابدىساعين
وتاندىق اكادەميالىق مۋزىكا الەمىندە جاڭا باستاما! الماتىنىڭ جامبىل اتىنداعى مەملەكەتتىك فيلارمونياسىندا سيمفونيالىق كونسەرت وتەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
مۋزىكالىق كەشتىڭ اۆتورى – جاھان جۇرتىنا جاقسى تانىس كومپوزيتور ءارى پيانيست راحات – بي ءابدىساعين.
مۋزىكا الەمىندە، اسىرەسە سيمفونيالىق مۋزىكادا اۆتورلىق كەش وتكىزۋ – سيرەك قۇبىلىس. ال زاماناۋي اكادەميالىق كەش – تىپتەن بولەك اڭگىمە. الماتى جۇرتى جاقىندا وسى ايرىقشا كونسەرتتىڭ كۋاسى بولماق. ونىڭ ەرەكشەلىگى – اۆتوردىڭ جاڭا كومپوزيتورلىق تەحنيكالاردى قولدانا وتىرىپ، ورىنداۋدىڭ تىڭ تاسىلدەرىن ۇسىنۋىندا.
«بۇل كونسەرت زاماناۋي اكادەميالىق مۋزىكانىڭ دامىپ جاتقانىنا دالەل. 6 تۋىندىنى ورىندايمىن، ونىڭ ءارقايسىسى ەرەكشە اسەر بەرەدى. زاماناۋي مۋزىكادان الماتىداعى ايرىقشا كونسەرت، دەگەنمەن بۇل ءالى باستاماسى عانا»، – دەدى كومپوزيتور راحات-بي ءابدىساعين.
كونسەرتتە رويال مەن ورگاندا وينايتىن راحات-بيدەن بولەك، بايقاداموۆ اتىنداعى حور كاپەللاسى مەن قازاقستاننىڭ مەملەكەتتىك اكادەميالىق سيمفونيالىق وركەسترى ونەر كورسەتەدى. تۇعىرى بيىك ونەردىڭ باعاسىن بىلەتىندەر ءۇشىن شەتەلدەن كەلەر قوناقتار دا ۇلكەن سىي بولماق. ماسەلەن، قوس عاسىردا قۇندى ەڭبەك قالدىرعان بريتاندىق ديريجەر كلەمەنت پاۋەر ارنايى كەلدى.
«مەن قازاقستاننان، مۇنداعى وركەستردىڭ جۇمىسىنان ءلاززات الامىن. راسىندا ءراحات-بيدىڭ ونەرى ءۇشىن كەلدىم. زاماناۋي اكادەميالىق مۋزىكانى جاستاردىڭ دامىتىپ، جاڭا بەلەسكە كوتەرىپ جاتقانى ۇنايدى. بۇل كونسەرتتە تىلسىم كۇش بار، كومبيناسيا كورىنىپ تۇر»، – دەدى ديريجەر كلەمەنت پاۋەر.
«كونسەرتتى ءوزىم جۇرگىزەمىن. جۇرگىزە وتىرىپ، ءار تۋىندىنىڭ سىرىن اشامىن. بىرنەشە اسپاپتا جەكە ورىنداۋلارىم دا بولادى. ال بۇل - قازاقستاندىق وركەستردىڭ زاماناۋي مۋزىكامەن العاشقى قاۋىشۋى»، – دەدى كومپوزيتور راحات-بي ءابدىساعين.
الەمدىك ارەنادا ونەرىمەن اتاعى شىققان وتاندىق كومپوزيتور راحات-بي ءابدىساعين قالا جۇرتىنا تامىزدىڭ 28ء-ى كونسەرت قويادى. بيىك ونەردىڭ ۇسىنارىن قالىڭ كوپشىلىك جامبىل اتىنداعى مەملەكەتتىك فيلارمونيادا تاماشالاي الادى.