الماتىنىڭ ءىز كەسۋشىلەرى ۇرىلاردىڭ 16 توبىن اشكەرەلەدى
الماتى پوليسيالارى ۇرلىق جاسادى دەگەن كۇدىكپەن ءبىر توپ ادامدى ۇستادى، دەپ حابارلادى، Almaty-akshamy.kz.
ىشكى ىستەر مينيسترلىگىنىڭ رەسمي سايتىندا جاريالانعان حابارعا سايكەس، الماتىنىڭ ءىز كەسۋشىلەرى ۇرىلاردىڭ 16 توبىن اشكەرەلەدى، – دەپ حابارلايدى Polisia.kz. قالالىق كريمينالدىق پوليسيانىڭ مالىمەتىنشە، پاتەرلەردەن ۇرلىق جاساۋ جىل باسىنان بەرى 2،1 ەسەگە ازايعان.
ارنايى جۇرگىزىلگەن تالداۋعا سايكەس، ۇرلىق كوبىنەسە كىلت تاڭداۋ، ەسىكتى سىندىرۋ، تەرەزە جانە بالكون ارقىلى كىرۋ ارقىلى جاسالادى. بيىلعى بەس ايدا قالا تۇرعىندارىنىڭ ۇيىنەن ۇرلىقتىڭ 88-دەن استام ەپيزودى دالەلدەنگەن 16 قىلمىستىق توپتىڭ قىلمىستىق ارەكەتى توقتاتىلدى، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.