دارىگەرلەر COVID-19 پاسيەنتتەرىن، سونىڭ ىشىندە وكپەنى ۆەنتيلياسيالىق جەلدەتۋدى قاجەت ەتەتىندەردى قابىلداۋعا تولىق دايىن. بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا الماتى قالاسى قوعامدىق دەنساۋلىق باسقارماسىنىڭ ورىنباسارى لاۋرا مىرزاعالي مالىمدەدى دەپ حابارلايدى almaty-akshamy.kz
لاۋرا ءمىرزاعاليدىڭ ايتۋىنشا، 18 كوۆيدتى ستاسيوناردا 1774 توسەك-ورىن اشىلعان.
سونىمەن قاتار، وتكەن تاۋلىكتە الماتىدا كوروناۆيرۋستىق ينفەكسيانى جۇقتىرۋدىڭ 146 جاعدايى تىركەلدى، ونىڭ ىشىندە 136-سى سيمپتومدى، 10-ى سيمپتومسىز.
- كوۆيدتىك ستاسيونارلاردا 792 پاسيەنت، ونىڭ ىشىندە 20 بالا بار. بارلىق ينفەكسيالىق ستاسيونارلاردا ءوجج جانە High flow اپپاراتتارى بار. رەانيماسيا بولىمشەلەرىندە 81 ادام ەمدەلۋدە. دارىگەرلەر مەن قىزمەتكەرلەر سانى دا جەتكىلىكتى، - دەدى لاۋرا مىرزاعالي.
ايتا كەتەرلىگى، دارىگەرلەر ۇيدە ەمدەلىپ جاتقان 1418 پاسيەنتتى باقىلاۋدا، ولارعا كۇن سايىن تەلەمەديسينا ورتالىعىنان قوڭىراۋ شالىنادى ءارى ءموبيلدى بريگادالار بارادى.
لاۋرا مىرزاعالي قالادا كوروناۆيرۋس ينفەكسياسىن جۇقتىرعاندار سانىنىڭ ايتارلىقتاي تومەندەگەنىن، الايدا جاعدايدى تۇراقتاندىرۋ جانە جاڭا ينفەكسيالاردىڭ الدىن الۋ ءۇشىن بارلىق ناۋقاستار مەن ۆاكسينا سالدىرعاندارعا ريەۆاكسيناسيا جۇرگىزۋ ۇسىنىلاتىنىن اتاپ ءوتتى. بۇل پروسەدۋرا تەگىن جانە قولجەتىمدى.
بۇگىندە ۆاكسينالاۋ باستالعاننان بەرى I كومپونەنتپەن 1 006 564 ادام، II كومپونەنتپەن – 946 920 ادام ەگىلدى. ەگىلگەندەردىڭ جالپى سانىنان 60 جاستان اسقاندار 121 498 ادام.
ەسكە سالساق، قالادا مەديسينالىق ۇيىمداردا، مادەنيەت جانە سپورت نىساندارىندا، بازارلار مەن سوسو-دا 132 ۆاكسيناسيا پۋنكتى بار. بۇلاردا 733 ادامنان تۇراتىن 205 ەگۋ بريگاداسى جۇمىس جاسايدى.