الماتىلىقتار حقكو-نا قاي قىزمەتكە ءجيى جۇگىنەتىنى جايلى وكق بريفينگىندە «ازاماتتارعا ارنالعان ۇكىمەتتىڭ» الماتى قالاسى بويىنشا فيليالىنىڭ وكىلدەرى ايتتى.
«ازاماتتارعا ارنالعان ۇكىمەت» مەملەكەتتىك كورپوراسياسىنىڭ الماتى قالاسى بويىنشا فيليالىنىڭ قۇرامىنا حالىققا قىزمەت كورسەتۋ بويىنشا 13 ءبولىم جۇمىس ىستەيدى (سونىڭ ىشىندە، 4 مامانداندىرىلعان حقو بولىمدەرى، 1 كوشى-قون ءبولىمى جانە 8 اۋداندىق حالىققا قىزمەت كورسەتۋ ورتالىقتارى)، دەپ حابارلايدى Almaty-akshamy.kz.
«ازاماتتارعا ارنالعان ۇكىمەت» مەملەكەتتىك كورپوراسياسى» كوممەرسيالىق ەمەس اكسيونەرلىك قوعامىنىڭ الماتى قالاسى بويىنشا فيليالى 2023 جىلدىڭ 12 ايىندا 2 861 085 مەملەكەتتىك قىزمەت كورسەتتى. ونىڭ ىشىندە مامانداندىرىلعان حالىققا قىزمەت كورسەتۋ جونىندەگى ءبولىم ارقىلى 1 280 252 مەملەكەتتىك قىزمەت ءتۇرى جانە دە مەملەكەتتىك قىزمەت كورسەتۋ حقو-لار ارقىلى وزىنە-وزى قىزمەت كورسەتۋ سەكتورلارىندا 1 580 833 مەملەكەتتىك قىزمەت، ەلەكتروندىق ۇكىمەت پورتالى ارقىلى – 31 075 قىزمەت العان»، - دەدى ازاماتتارعا ارنالعان ۇكىمەت مك كاق الماتى قالاسى بويىنشا فيليالىنىڭ ساپانى باقىلاۋ باسقارماسىنىڭ باسشىسى مادينا امانوۆا.
سونىمەن بىرگە، سپيكەر ەڭ تانىمال قىزمەتتەردى اتاپ ءوتتى:
- ەلەكتروندىق-سيفرلىق قولتاڭبانى الۋ:
- كولىك قۇرالىن تىركەۋ؛
- جۇرگىزۋشى كۋالىگىن الۋ؛
- الەۋمەتتىك سەكتور قىزمەتتەرى؛
- جىلجىمايتىن مۇلىكتى تەحنيكالىق تەكسەرۋ جانە تىركەۋ.
- ق ر ازاماتتارىنا پاسپورتتار مەن جەكە كۋالىكتەر دايىنداۋ جانە بەرۋ.
مەملەكەتتىك كورسەتىلەتىن قىزمەتتەر تىزىلىمىنە سايكەس 1353 مەملەكەتتىك قىزمەت تۇرلەرىنىڭ ىشىنەن مىنالاردى الۋعا بولادى:
- مەملەكەتتىك كورپوراسيا ارقىلى 1267 قىزمەت (93،6%)؛
- «ەلەكتروندىق ۇكىمەت» پورتالى ارقىلى 1214 قىزمەت (89،7%)؛
- تەك قىزمەت كورسەتۋشى ارقىلى 84 قىزمەت (6،2%).
«2023 جىلى 996 802 كولىك قۇرالى تىركەلگەن. 427 303 شەتەلدىك پاسپورتتار مەن جەكە كۋالىكتەر دايىندالىپ بەرىلدى، بۇل رەتتە وتكەن جىلى 5300-گە جۋىق ادام مەدەۋ حقكو-دا بەلگىلەنگەن قۇجاتتاۋ تەرمينالدارى ارقىلى ءوتىنىم بەردى. 2024 جىلى اۋەزوۆ اۋداندىق حقو-دا قۇجاتتاندىرۋ تەرمينالدارىن ورناتۋ جوسپارلانۋدا. 418 782 ەلەكتروندىق-سيفرلىق قولتاڭبا بەرىلدى. 265 326 جۇرگىزۋشى كۋالىگى بەرىلدى»، - دەدى م.امانوۆا.
سونىمەن قاتار، فيليالى جەر كاداسترى، جىلجىمايتىن مۇلىكتى تەحنيكالىق تەكسەرۋ، جىلجىمايتىن مۇلىكتى جانە زاڭدى تۇلعالاردى تىركەۋ جەلىسى بويىنشا 442 078 مەملەكەتتىك قىزمەت كورسەتتى.
الەۋمەتتىك بلوك جەلىسى بويىنشا 2023 جىلى 313 211 مەملەكەتتىك قىزمەت كورسەتىلدى. احات جەلىسى بويىنشا 50 383 مەملەكەتتىك قىزمەت كورسەتىلدى.