قىلمىسكەرلەردىڭ ولجاسى 3 ميلليون تەڭگە جانە 13 مىڭ دوللاردان اسادى.
جاڭا جىل قارساڭىندا سينگاپۋر ازاماتتارىنا قاراقشىلىق شابۋىل جاسالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
بەلگىسىز بەس ادام شەتەلدىكتەردىڭ جالدامالى ۇيىنە باسىپ كىرىپ، ولاردى قارۋمەن قورقىتىپ، جيعان-تەرگەندەرىن بەرۋدى تالاپ ەتكەن. قىلمىسكەرلەردىڭ ولجاسى 3 ميلليون تەڭگە جانە 13 مىڭ دوللاردان اسادى.
«بۇل قىلمىستى اشۋ ءۇشىن ارنايى جەدەل-تەرگەۋ توبى قۇرىلدى. شابۋىل جاساعاندار انىقتالىپ، ۇستالدى. بۇل – 1999، 2001، 2003 جىلى تۋعان الماتى وبلىسىنىڭ بەس تۇرعىنى. قىلمىستىڭ نەگىزگى ۇيىمداستىرۋشىسى ت.ەسىمدى ازامات بۇرىن قاراقشىلىق شابۋىل جاساعانى ءۇشىن سوتتالعان. ايتپاقشى، ول زارداپ شەككەندەرمەن جۇمىس ىستەگەن، ولاردىڭ تابىسى تۋرالى بىلەدى. قىلمىستىق وقيعانىڭ حرونولوگياسىن جانە بارلىق دايىندىق پروسەسىن جىلدام قالپىنا كەلتىرۋگە مۇمكىندىك تۋدى. بۇل رەتتە بەينەباقىلاۋ جۇيەلەرى ماڭىزدى ءرول اتقاردى. ايعاقتى زاتتار، ونىڭ ىشىندە ەكى ويىنشىق تاپانشا تاركىلەندى»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ.
كۇدىكتىلەر پد-نىڭ ۋاقىتشا ۇستاۋ يزولياتورىنا قامالدى. شەتەل ازاماتتارى پوليسيانىڭ كاسىبي جۇمىسىن ەرەكشە اتاپ ءوتتى.
«ءبىزدى قاتتى قورقىتتى. پوليسيا قىزمەتكەرلەرى جارادى. قىلمىسكەرلەردى تەز قولعا ءتۇسىردى. ولارعا ءوز اتىمنان جانە ەلىمىزدىڭ اتىنان شەكسىز العىسىمدى بىلدىرگىم كەلەدى»، – دەدى جابىرلەنۋشىلەردىڭ ءبىرى.