الماتى قالاسىنىڭ ەلەكتر جەلىلەرىن دامىتۋ: 2030 جىلعا دەيىنگى جوسپار
الماتى – ەلىمىزدىڭ ەڭ ءىرى قارجى-ەكونوميكالىق جانە مادەني ورتالىعى، حالىقتىڭ ءومىر ءسۇرۋ دەڭگەيىن ارتتىرۋ بويىنشا كوپتەگەن ماڭىزدى مىندەتتەردى ورىندايتىن مەگاپوليس. وسى ورايدا، قالا ەنەرگەتيكالىق ينفراقۇرىلىمدى جاڭعىرتۋدى قاجەت ەتەدى، ويتكەنى ەلەكترمەن جابدىقتاۋدىڭ سەنىمدىلىگى مەن ساپاسىنا قويىلاتىن تالاپتار جىلدان جىلعا ارتىپ كەلەدى.
قازىرگى ۋاقىتتا الماتى قالاسىنىڭ ەنەرگەتيكالىق ينفراقۇرىلىمى كەلەسى كورسەتكىشتەرمەن سيپاتتالادى:
- جالپى قۋاتى 2250 مۆا بولاتىن 220 كۆ كەرنەۋلى 5 قوسالقى ستانسيا؛
- جالپى قۋاتى 3582 مۆا بولاتىن 110 كۆ كەرنەۋلى 49 قوسالقى ستانسيا؛
- جالپى قۋاتى 405،7 مۆا بولاتىن 35 كۆ كەرنەۋلى 20 قوسالقى ستانسيا؛
- 8،6 مىڭ شاقىرىمنان اساتىن ەلەكتر جەلىلەرى.
ەلەكتر تۇتىنۋ قۋاتى جىل سايىن ارتىپ كەلەدى. ەگەر ءقازىر الماتى قالاسىنىڭ تۇتىنۋ قۋاتى 982 مۆت قۇراسا، 2030 جىلعا قاراي بۇل كورسەتكىش 468 مۆت-قا ارتىپ، 1450 مۆت-قا جەتەدى. ال 2040 جىلعا قاراي تۇتىنۋ قۋاتى 1700 مۆت-قا دەيىن وسەدى دەپ بولجانۋدا.
قالانىڭ ەنەرگەتيكالىق ينفراقۇرىلىمىن دامىتۋ ءۇشىن الماتى قالاسىنىڭ اكىمدىگى 2030 جىلعا دەيىن جانە 2040 جىلعا دەيىنگى پەرسپەكتيۆالىق ەلەكتر جەلىلەرىن دامىتۋ جوسپارىن ازىرلەدى. جوسپار اياسىندا كەلەسى مىندەتتەر قويىلعان:
- جاڭا قوسالقى ستانسيالاردى سالۋ؛
- قولدانىستاعى ەلەكتر جەلىلەرىن جاڭعىرتۋ جانە قايتا قۇرۋ؛
- اۋا جەلىلەرىن كابەلدىك جەلىلەرگە اۋىستىرۋ؛
- جاڭا تۇتىنۋشىلاردى قوسۋ شەكتەۋلەرىن جويۋ.
بۇل ءىس-شارالار تۇتىنۋشىلاردى ساپالى ەلەكتر ەنەرگياسىمەن قامتاماسىز ەتۋگە، تۇرعىنداردىڭ قاۋىپسىزدىگىن ارتتىرۋعا جانە پايدالانۋ شىعىندارىن ازايتۋعا مۇمكىندىك بەرەدى. سونىمەن قاتار، اۋە جەلىلەرىنىڭ قورعاۋ ايماقتارىندا ورنالاسقان جەر ۋچاسكەلەرىن بوساتۋ ارقىلى قالانىڭ اۋماعىن ءتيىمدى پايدالانۋ جۇزەگە اسىرىلادى.
ەلەكتر جەلىلەرىن دامىتۋ سحەماسىن بەكىتۋ:
- قاجەتتى ەلەكتر ەنەرگياسى كوزدەرىنىڭ جەتكىلىكتىلىگىن انىقتاۋعا مۇمكىندىك بەرەدى.
- ەلەكتر جەلىلەرىن جاڭادان پايدا بولاتىن جانە قۋاتىن ارتتىراتىن تۇتىنۋشىلارعا بەيىمدەۋ ءۇشىن جۇمىستار كولەمىن ناقتىلاۋعا جول اشادى.
- تەحنيكالىق نورماتيۆتىك مەرزىمى وتكەن جەلىلەردىڭ پايىزىن تومەندەتۋ ءۇشىن قايتا قۇرۋ جۇمىستارىن جوسپارلاۋعا مۇمكىندىك بەرەدى.
- قاجەتتى كاپيتال سالىمدارىنىڭ كولەمىن جانە قارجىلاندىرۋ كوزدەرىن ايقىندايدى.
بۇل باعدارلامانى جۇزەگە اسىرۋ الماتى قالاسىنىڭ ەنەرگەتيكالىق ينفراقۇرىلىمىن جاڭعىرتىپ، تۇتىنۋشىلاردىڭ سۇرانىسىن قاناعاتتاندىرىپ قانا قويماي، مەگاپوليستىڭ تۇراقتى دامۋىن قامتاماسىز ەتەدى.