الماتىنىڭ ەكى ميلليونىنشى تۇرعىنى دۇنيەگە كەلدى

الماتىنىڭ ەكى ميلليونىنشى تۇرعىنى پوليسيا قىزمەتكەرى مەن بالاباقشا تاربيەشىسىنىڭ وتباسىندا دۇنيەگە كەلدى.

مەگاپوليس اكىمى باقىتجان ساعىنتايەۆ قالانىڭ ەكى ميلليونىنشى تۇرعىنى اتانعان ايالا جامبىلدىڭ وتباسىندا بولدى، دەپ حابارلايدى Almaty-akshamy.kz.

ۇلتتىق ستاتيستيكا بيۋروسىنىڭ مالىمەتى بويىنشا، قازاقستاندىقتاردىڭ سانى 19 ميلليونعا جەتتى، ال الماتىدا بۇل كورسەتكىش ەكى ميلليوندىق مەجەدەن استى.

ايالا جامبىل پوليسيا قىزمەتكەرى بەيبىت ابىلدايەۆ پەن بالاباقشا تاربيەشىسى ءاليا جانىبەكوۆانىڭ وتباسىندا دۇنيەگە كەلدى. ول – وتباسىنداعى التىنشى قىز. ب. ساعىنتايەۆ جاڭا تۋعان نارەستەگە جانە ونىڭ اتا-اناسىنا دەنساۋلىق، باق-بەرەكە جانە باقىت تىلەدى.

بەيبىتتىڭ اناسى رىستى ساتىلعانوۆا ايالانىڭ ون ەكىنشى نەمەرەسى ەكەنىن جانە كۇتپەگەن جەردەن تانىمال بولعانىن ايتادى. ايتا كەتەرلىگى، قالالىق ۇلتتىق ستاتيستيكا بيۋروسىنىڭ ماماندارى كىشكەنتاي نارەستەنىڭ الماتىنىڭ ەكى ميلليونشى تۇرعىنى بولعانىن انىقتاعان.

«ءبىز "قارعالى" شاعىناۋدانىندا الماتى وبلىسىنىڭ قاراساي اۋدانىنا قاراستى بولعان كەزدەن باستاپ تۇرامىز. قالاعا قوسىلعاننان بەرى كوپتەگەن وزگەرىستەر بولدى. بىرىنشىدەن، بارلىق كوشەلەر جارىقتاندىرىلدى، جولدار جوندەلدى جانە تروتۋارلار توسەلدى. كەلەسى جىلى سۋمەن قامتاماسىز ەتۋ ماسەلەسى شەشىلەدى، ويتكەنى قارعالى وزەنىندە جاڭا سۋ ستانسياسى ىسكە قوسىلاتىن بولادى»، - دەدى ر. ساتىلعانوۆا. 

ايالانىڭ اتا-انالارى بەيبىت پەن ءاليانىڭ ايتۋىنشا، قازىرگى كەزدەگى باستى مىندەت – دەنساۋلىقتى ساقتاۋ، سوندىقتان كوروناۆيرۋسقا قارسى ءتۇراتىن ەكپە سالدىرۋ قاجەت ەكەنىن، بالالاردىڭ قالىپتى ءومىر ءسۇرۋى جانە وقۋى، سالاۋاتتى قوعامدا ءومىر ءسۇرۋى ءۇشىن ەكپە سالدىرۋ كەرەك.

اباي اتىنداعى قازۇپۋ ساياساتتانۋ جانە الەۋمەتتىك-فيلوسوفيالىق پاندەر كافەدراسىنىڭ مەڭگەرۋشىسى جومارت سىلتىكوۆ الماتى قالاسى تۇرعىندارىنىڭ دەموگرافيالىق ءوسىمى «شەتسىز قالا» قاعيداسىنا سايكەس الەۋمەتتىك جانە ينجەنەرلىك ينفراقۇرىلىمدى جاقسارتۋ بويىنشا قابىلدانعان شارالاردىڭ ناتيجەسى ەكەنىن اتاپ ءوتتى.

«تاۋەلسىزدىكتىڭ 30 جىلىندا الماتى ورتالىق ازيا ايماعىنداعى ەڭ ءىرى قالاعا اينالدى. مادەني-ەكونوميكالىق ورتالىق رەتىندە قالا ودان ءارى دامي بەرەدى. بۇل پروسەسس وڭ اسەر ەتەدى، ويتكەنى ەكونوميكالىق بەلسەندى حالىقتىڭ ۇلەسى وسەدى. حالىقتىڭ دەموگرافيالىق ءوسۋى قولايلى ءومىر ءسۇرۋ جاعدايلارىن جاساۋ، جۇمىس ورىندارىن قۇرۋ، جاڭا تەحنولوگيالاردى دامىتۋ، مەگاپوليستە ءومىردىڭ بارلىق سالالارىن سيفرلاندىرۋ بويىنشا بار ماسەلەلەردى شەشۋگە مۇمكىندىك بەرەدى»، - دەدى ج. سىلتىكوۆ.