الماتى قالاسى اكىمىنىڭ ورىنباسارى بەيبىت شاحانوۆ بوستاندىق اۋدانىندا تاۋلىگىنە 500 ادام قابىلداۋعا ارنالعان جاڭا ەمحانانىڭ قۇرىلىس بارىسىن تەكسەردى. اۋدان تۇرعىندارى ءۇشىن مەديسينالىق قىزمەتتىڭ قولجەتىمدىلىگىن ەداۋىر ارتتىرۋعا باعىتتالعان نىسان ليەۆيتان كوشەسىندە سالىنىپ جاتىر.
بۇگىنگى كۇنى نىسانداعى ءتورت بلوك بويىنشا ءمونوليتتى تەمىربەتون جانە شاتىر جۇمىستارى تولىق اياقتالعان. قاباتتاردا تەرەزە قۇرىلىمدارى ورناتىلىپ، ينجەنەرلىك جەلىلەر تارتىلعان، ارلەۋ جۇمىستارىنىڭ سوڭعى كەزەڭى جۇرگىزىلۋدە. قاسبەتتى قاپتاۋ جانە اۋماقتى اباتتاندىرۋ جۇمىستارى دا قاتار اتقارىلۋدا.
«جاڭا ەمحانانىڭ قۇرىلىسى اياقتالۋعا جاقىن. بۇل قولدانىستاعى مەديسينالىق مەكەمەلەردىڭ جۇكتەمەسىن ازايتىپ، اۋدان تۇرعىندارىنا زاماناۋي تالاپتارعا ساي، جاياۋ جەتۋگە ىڭعايلى مەديسينالىق قىزمەت كورسەتۋگە ارنالعان ماڭىزدى نىسان. ءبىز ىستەلىپ جاتقان جۇمىستىڭ ساپاسىنا ەرەكشە كوڭىل بولەمىز. ەمحانا قازىرگى ستاندارتتارعا تولىق ساي سالىنۋدا، پاسيەنتتەر مەن مەديسينا قىزمەتكەرلەرىنە بارىنشا قولايلى جاعداي جاساۋ كوزدەلگەن. نىساندى وسى جىلدىڭ سوڭىنا دەيىن پايدالانۋعا بەرۋ قاجەت»، – دەدى بەيبىت شاحانوۆ.
جوبادا پاسيەنتتەردىڭ سانىن بولە وتىرىپ، ءتۇرلى بولىمدەر مەن قىزمەتتەردى قامتيتىن كوپفۋنكسيونالدى مەديسينالىق مەكەمە قاراستىرىلعان.
مىسالى، ءبىرىنشى قاباتتا ساۋلەلىك دياگنوستيكا ءبولىمى، حيرۋرگيالىق جانە تراۆماتولوگيالىق كابينەتتەر، فتيزياتريالىق قىزمەت (ەرەسەكتەر مەن بالالارعا ارنالعان)، قابىلداۋ جانە سۇزگى كابينەتتەرى، بالالاردى امبۋلاتورلىق قابىلداۋ، الەۋمەتتىك ءدارىحانا، اسحانا جانە كۇتۋ ايماقتارى ورنالاسادى.
ەكىنشى قاباتتا ايەلدەر كونسۋلتاسياسى، جاستار دەنساۋلىعى ورتالىعى، وتباسىلىق دەنساۋلىق ورتالىعى، كەڭەس بەرۋ جانە دياگنوستيكالىق ءبولىم، پروفيلاكتيكا جانە الەۋمەتتىك-پسيحولوگيالىق كومەك ءبولىمى ورنالاسپاق.
ءۇشىنشى قاباتتا ەندوسكوپيا ءبولىمى، امبۋلاتورلىق حيرۋرگيا ورتالىعى، كۇندىزگى ستاسيونار، كلينيكالىق-دياگنوستيكالىق زەرتحانا، اكىمشىلىك بلوك، مەديسينالىق وڭالتۋ جانە فيزيوتەراپيا بولىمدەرى قاراستىرىلعان. جەرتولە قاباتتا ورتالىق زارارسىزداندىرۋ ءبولىمى ورنالاسادى.