دەنساۋلىق ساقتاۋ سالاسىن جەتىلدىرۋگە قوسىمشا 18،7 ملرد تەڭگە ءبولىندى. بۇل قاراجات الماتىداعى مەديسينالىق مەكەمەلەردىڭ اۋقىمدى جاڭعىرتۋ جۇمىستارىنا باعىتتالادى. بۇل تۋرالى الماتى قارجى باسقارماسىنىڭ باسشىسى قانات سۋحامبەكوۆ ايتتى.
«قالقامان» شاعىن اۋدانىنداعى №7 قالالىق كلينيكالىق اۋرۋحانا مەن تۇركسىب اۋدانىنداعى №4 قالالىق كلينيكالىق اۋرۋحانانى جاڭعىرتۋ جۇمىستارى باستالادى. جوبا اياسىندا ەمدەۋ كورپۋستارى جاڭارتىلىپ، زاماناۋي مەديسينالىق جابدىقتار ساتىپ الىنادى. سونداي-اق، جاڭا جەلدەتۋ جانە ەنەرگيا ۇنەمدەۋ جۇيەلەرى ەنگىزىلەدى.
«اسىرەسە، بوستاندىق اۋدانىندا 500 ادامدى قابىلداي الاتىن جاڭا ەمحانانىڭ قۇرىلىسىن ەرەكشە اتاپ وتكىم كەلەدى. بۇل اۋدان تۇرعىندارى ءۇشىن ساپالى مەديسينالىق كومەكتىڭ قولجەتىمدىلىگىن قامتاماسىز ەتەدى»، – دەدى قانات سۋحامبەكوۆ.
ونىڭ ايتۋىنشا، الاتاۋ اۋدانىنىڭ «سايالى» شاعىن اۋدانىندا جانە تۇركسىب اۋدانىنداعى ايباسوۆ كوشەسىندە سالىنىپ جاتقان وتباسىلىق-دارىگەرلىك امبۋلاتوريالاردىڭ قۇرىلىسى اياقتالۋعا جاقىن. بۇل نىسانداردى بيىل شىلدە ايىندا پايدالانۋعا بەرۋ جوسپارلانىپ وتىر.
ايتا كەتەيىك، الماتىدا دەنساۋلىق ساقتاۋ سالاسىنا بولىنەتىن قارجى قالا اكىمى ەربولات دوسايەۆتىڭ تاپسىرماسىمەن مەديسينالىق ينفراقۇرىلىمدى جاڭعىرتۋعا باعىتتالىپ وتىر.