بىرنەشە اۋداندا عيماراتتار بيىكتىگى شەكتەلەدى
قالالىق ءماسليحات «الماتى قالاسى اۋماعىنىڭ فۋنكسيونالدىق ايماقتارىندا قۇرىلىس سالۋدىڭ قالا قۇرىلىسى رەگلامەنتتەرىن ىسكە اسىرۋ جوسپارىن بەكىتۋ» شەشىمىنە وزگەرىس پەن تولىقتىرۋلار ەنگىزۋ شەشىم قابىلدادى، دەپ حابارلايدى Almaty-akshamy.kz قازاقپارات-قا سىلتەمە جاساپ.
الماتىنىڭ بىرنەشە اۋدانىندا كوپقاباتتى ءۇي سالۋعا تىيىم سالىنادى. ءماسليحات شەشىمىنىڭ جوباسى قوعامدىق تالقىلاۋ ءۇشىن اشىق نقا پورتالىندا جاريالاندى. «اباي داڭعىلىنىڭ وڭتۇستىگىندە، ءال-فارابي داڭعىلىنىڭ سولتۇستىگىندە، ياسساۋي كوشەسىنىڭ شىعىسىندا، شىعىس اينالما جولىنىڭ (شااج ) باتىسىندا ورنالاسقان تۇرعىن ۇيلەردىڭ رۇقسات ەتىلگەن ماكسيمالدى بيىكتىگى عيماراتتاردىڭ بارلىق تۇرلەرى ءۇشىن 6-9 قاباتتان اسپايدى. قۇرىلىستىڭ بارلىق ورتاشا جوسپارلى بيىكتىگى شاتىردىڭ توبەسىنە دەيىن 35 مەتردەن جوعارى بولماۋى ءتيىس. بۇل رەتتە تۇرعىن ءۇي عيماراتتارى جايلىلىقتىڭ ءۇشىنشى سااناتىنان تومەن بولماۋى كەرەك»،- دەلىنگەن قۇجاتتا. سونداي-اق، كورسەتىلگەن اۋماقتا اۋىل شارۋاشىلىعى ماقساتىنا ارنالعان جەر ۋچاسكەلەرىن ماقساتتى پايدالانا وتىرىپ بولۋگە جانە تاۋ سورەلەرى جولاعىندا، ونىڭ ىشىندە ەڭىستىگى 15 گرادۋس جانە ودان جوعارى الاڭداردا از قاباتتى عيماراتتار سالۋعا جول بەرىلمەيدى. دەنساۋلىق ساقتاۋ جانە ءبىلىم بەرۋ وبەكتىلەرىن سالۋدى قوسپاعاندا، شىعىس اينالما جولىنىڭ (شااج)، ءال-فارابي داڭعىلى، ساين داڭعىلى، جاندوسوۆ كوشەسى (ساين داڭعىلىنان قالا شەكاراسىنا دەيىن) وڭتۇستىگىنە قاراي ورنالاسقان عيماراتتاردىڭ پارامەترلەرى ءۇش قاباتتان ارتىق ەمەس جانە دەنساۋلىق ساقتاۋ جانە ءبىلىم بەرۋ وبەكتىلەرىن سالۋدى قوسپاعاندا، ەڭ جوعارى بيىكتىگى ون ەكى مەتردەن اسپاۋى ءتيىس. الماتى قالاسىن جوسپارلاۋ جانە قالا قۇرىلىسى باسقارماسىنىڭ باسشىسى الماسحان احمەدجانوۆ ازىرلەنگەن شەشىمدەردىڭ سەيسميكالىق جوعارى، اۆتوموبيل كولىگىنىڭ، ينجەنەرلىك جانە الەۋمەتتىك ينفراقۇرىلىم دامۋىنىڭ شەكتەلۋىنە بايلانىستى قۇرىلىسقا قولايسىز ايماقتارداعى جەرلەردىڭ جاپپاي يگەرىلۋىن شەكتەۋ مەن دەمالىس ايماعىن ۇلعايتۋعا كومەكتەسەتىنىن اتاپ ءوتتى.
«اباي داڭعىلىنىڭ وڭتۇستىگىندەگى، ءال-فارابي داڭعىلىنىڭ سولتۇستىگىندەگى، ءاشىموۆ كوشەسىنىڭ شىعىسىنداعى، شىعىس اينالما جولى (شااج) اۋماعىنداعى عيماراتتاردىڭ بيىكتىگىن شەكتەۋ اۋماقتىڭ تىعىزدىعىن، الەۋمەتتىك، كولىكتىك جانە ينجەنەرلىك ينفراقۇرىلىمعا تۇسەتىن جۇكتەمەنى ازايتىپ، جاڭا دەمالىس ايماقتارىنىڭ پايدا بولۋىنا اسەر ەتەدى»، – دەدى الماسحان احمەدجانوۆ.