«وپتوۆكانى» 2013 جىلدىڭ جەلتوقسانىندا «نايزا-بن» كومپانياسى مەملەكەتتەن ساتىپ العان.
سوت الماتىلىق اتاقتى بازاردى مەملەكەتكە قايتاردى، دەپ حابارلايدى Almaty-akshamy.kz
Tengrinews.kz تاراتقان اقپاراتقا سايكەس، الماتىنىڭ ەكونوميكالىق سوتى بۇعان دەيىن جەكەشەلەندىرىلگەن Barys IV بازارىن مەملەكەت مەنشىگىنە قايتارۋدى تالاپ ەتكەن قالالىق پروكۋراتۋرانىڭ شاعىمىن قاناعاتتاندىردى.
ءىس ماتەريالدارىنان 2013 جىلدىڭ جەلتوقسانىندا «نايزا-بن» كومپانياسى Barys IV بازارىن مەملەكەتتەن ساتىپ الىپ، الماتى قالاسى مەملەكەتتىك مۇلىك جانە جەكەشەلەندىرۋ دەپارتامەنتىمەن كەلىسىم شارت جاسالعانى بەلگىلى بولدى. بۇعان دەيىن باس پروكۋراتۋرا بۇل نىساننىڭ بەس ەسە ارزان باعاعا ساتىلعانىن حابارلاعان بولاتىن. نارىقتىق قۇنى 1،5 ميلليارد تەڭگە بولسا، 307 ميلليون تەڭگەگە ساتىلعان. وسىعان بايلانىستى الماتى پروكۋراتۋراسى جوعارىدا اتالعان كەلىسىمشارتتى جارامسىز دەپ تانۋ تۋرالى تالاپ-ارىزبەن سوتقا جۇگىنگەن.
«مەملەكەتتىك ورگان زاڭدى تۇلعانىڭ جارعىلىق كاپيتالىنداعى مەملەكەتتىڭ ۇلەسىن جەكەشەلەندىرۋ كەزىندە زاڭسىز جەڭىلدىكتەر مەن ارتىقشىلىقتار بەرۋى پروكۋروردىڭ تالاپ قويۋىنا نەگىز بولىپ وتىر. سوت تالقىلاۋى بارىسىندا تالاپ ارىزدا كەلتىرىلگەن دالەلدەر راستالدى. مامىلەنى جارامسىز دەپ تانۋ ءۇشىن ساتىپ الۋشىعا وبەكتىنىڭ قۇنىن تومەن باعالاۋدا كورسەتىلگەن زاڭسىز جەڭىلدىكتەر مەن ارتىقشىلىقتار بەرۋ نەگىز بولدى. سوتتا مەملەكەتتىك مۇلىكتى ارزانداتىلعان باعامەن ساتۋ دەرەگى راستالدى»، - دەدى قالالىق سوتتىڭ باسپا ءسوز قىزمەتى.
سوت تالاپ-ارىزدى قاناعاتتاندىرىپ، ساتىپ الۋ-ساتۋ شارتىن جارامسىز دەپ تانۋ تۋرالى شەشىم قابىلداعانى اتاپ وتىلگەن.
«الماتى پروكۋراتۋراسىنىڭ تالاپ-ارىزى قاناعاتتاندىرىلىپ، ساتىپ الۋ-ساتۋ شارتى جارامسىز دەپ تانىلسىن. سوت شەشىمىنە سوڭعى شەشىم شىعارىلعان كۇننەن باستاپ ءبىر اي ىشىندە اپەللياسيالىق جانە پروكۋرورلىق ءوتىنىشحات بەرۋگە بولادى»، - دەدى سۋديا جانار ەسەمبايەۆا.
سوتتىڭ شەشىمى زاڭدى كۇشىنە ەنگەن جوق.