الماتى قالاسىنىڭ تۇرعىنى باعلان باۋىرجان ۇلى ويلاپ تاپقان ءموبيلدى قوسىمشانىڭ كوپكە كومەگى تيگەن.
ونەرتاپقىشتىڭ ستارتاپ جوباسى اۆتوشەبەرلەر مەن كولىك جۇرگىزۋشىلەرىن ءبىر قوسىمشادا بايلانىستىرادى. Beep دەپ اتالاتىن جوبا - كولىگى سىر بەرگەندەر ءۇشىن تاپتىرماس كومەكشى. جاس كاسىپكەر ەلىمىزدە جوعارى باعالانعان جۇيەنى اقش نارىعىنا شىعارۋدى دا جوسپارلاپ وتىر، دەپ حابارلايدى Almaty-akshamy.kz.
ونەرتاپقىش باعلان باۋىرجانۇلىنا جولدا بۇزىلىپ قالعان كولىكتەرگە جىلدام كومەك كورسەتۋ يدەياسى ويلاماعان جەردەن كەلەدى. ءبىر كۇنى باسقا قالادان كەلە جاتىپ، تەمىر تۇلپارىنىڭ اككۋمۋلياتورى وتىرىپ، قولايسىز جاعدايعا تاپ بولادى. ماشيناسىن تەز جوندەپ بەرە قوياتىن شەبەر ىزدەپ ابدەن قينالادى. سودان سوڭ وسى جوبانى ءوزى قولعا الادى. «جاس كاسىپكەر» كۋرسىنا قاتىسىپ، بيزنەس جوسپارىن قورعاپ، 505 مىڭ تەڭگە مەملەكەتتىك گرانت يەگەرى اتانادى. وعان ەكى نوۋتبۋك الىپ، قوسىمشانىڭ باعدارلاماسىن جازا باستايدى. بۇدان بولەك 100 مىڭ دوللار ينۆەستيسيا تارتادى. بۇل 2019 جىل ەدى. نارىقتاعى قاجەتتىلىكتى ءدوپ باسقان ستارتاپ جوبا بۇگىندە تابىستى كاسىپ كوزىنە اينالعان. قازاقستان مەن رەسەيدىڭ 15 قالاسىندا پايدالانىلاتىن ءموبيلدى قوسىمشا ەندى اقش تۇرعىندارى ءۇشىن دە قولجەتىمدى بولادى.
«قازاقستانعا ۇلكەن تابىس الىپ كەلەدى، ەكونوميكاسىنا دا، ويتكەنى 280 ملن اۆتوكولىك، ونىڭ 50 ملن اۆتوكولىگى از دەگەندە ەكى جىل سايىن قىزمەت كورسەتۋدى قاجەت ەتەدى. ول 100 ملرد دوللار جىلىنا. ول جاقتا جوندەۋ 100 دوللاردان جوعارى»، - دەيدى Beep جوباسىنىڭ قۇرىلتايشىسى باعلان باۋىرجان ۇلى.
باعلاننىڭ ونەرتابىسى بۇگىندە ءبىرقاتار اۆتوشەبەرلەردىڭ قوسىمشا تابىس كوزىنە اينالعان. ولار وسىنداعى تاپسىرىستاردى ورىنداپ، تابىسىن ارتتىرىپ ءجۇر. ناقتىراق ايتساق، بۇل باعدارلاما ارقىلى جانارماي جەتكىزۋ، دوڭگەلەك ۇرلەۋ، كولىك وتالدىرۋ، ەۆاكۋاتور شاقىرۋ سىندى تاپسىرىستان باستاپ، كۇردەلى جوندەۋ جۇمىستارىنا دەيىن قامتىلعان.
«ماشينام اشىلماي، سيگناليزاسياسى ءجوندى ىستەمەي، پروبلەماسىن جازىپ، ءتۇسىرىپ، ءوتىنىم تاستاعام. ءوز باعاسىن قويىپ، 5 مينۋت ىشىندە حابارلاستى ەلەكتريكتەر. مەكەنجايىمدى ايتتىم، جارتى ساعاتتىڭ ىشىندە كەلىپ جاساپ بەردى»، - دەيدى كولىك جۇرگىزۋشى بەكزات يسمايل.
ونەرتاپقىش ەندى بۇل قوسىمشانىڭ قىزمەتتەر ءتىزىمى مەن مۇكىندىگىن كەڭەيتۋدى ويلاستىرىپ وتىر. سونىڭ ءبىرى – اۆتوموبيلدەردىڭ تەحنيكالىق جاعدايىن الدىن الا باعالايتىن، كولىك يەسىنە دەر كەزىندە ەسكەرتۋ جاسايتىن جاساندى ينتەللەكت جۇيەسىن ىسكە قوسپاق.