وسى اپتادا قالامىزدا بولعان ماڭىزدى جاڭالىقتارعا شولۋ.
«...مال قالعانشا، تال قالسىن»
الماتى تۇرعىندارى كوپقاباتتى ۇيلەردىڭ اۋلاسىن جانە قوعامدىق كەڭىستىكتەردى كوگالداندىرۋ ءۇشىن كوشەتتەردى تەگىن الا الادى. 2025 جىلدىڭ كوكتەمگى كەزەڭىندە 228 ءوتىنىم ماقۇلدانىپ، شامامەن 2 مىڭ جاپىراقتى اعاش كوشەتى تەگىن تاراتىلادى.
كوشەتتەر 2025 جىلى 19-20 ساۋىردە ءار اۋداننىڭ كوميۋنيتي ورتالىقتارىندا تاراتىلادى. ءار كوميۋنيتي ورتالىقتا 100 داناعا دەيىن كوشەت بەرىلەدى. اكسياعا قاتىسۋشىلار كەيىننەن كوشەتتەردى وتىرعىزعانى جونىندە فوتوەسەپ تاپسىرۋى ءتيىس.
5 499 تاس
40 جاستاعى ناۋقاستىڭ ءوت قابىنان وسىنشا تاس الىنعان. بۇل – وتاندىق مەديسينا تاريحىندا تىركەلگەن ەڭ سيرەك جاعدايلاردىڭ ءبىرى. الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، ناۋقاس ورتالىق قالالىق كلينيكالىق اۋرۋحاناعا جەدەل كورسەتكىشتەر بويىنشا جەتكىزىلگەن. ونىڭ نەگىزگى شاعىمدارى – وڭ جاق قابىرعا استىنداعى اۋىرسىنۋ، السىزدىك، جۇرەك اينۋى مەن جالپى مازاسىزدىق بولعان. ۋلترادىبىستىق زەرتتەۋ بارىسىندا ءوت قابىندا وتە كوپ كولەمدە كونكرەمەنتتەر (تاستار) انىقتالىپ، دارىگەرلەر لاپاروسكوپيالىق حولەسيستەكتوميا (ءوت قابىن الىپ تاستاۋ) جاساۋعا شەشىم قابىلداعان.
– ءبىز كوپ تاس بولاتىنىن بولجادىق، ءبىراق 5 500-گە جۋىق بولادى دەپ ەشكىم ويلاعان جوق. 20 جىلدىق تاجىريبەمدە مۇنداي جاعدايمەن العاش رەت كەزدەستىم، – دەدى حيرۋرگيا جونىندەگى باس دارىگەردىڭ ورىنباسارى فارابي ستامقۇلوۆ.
پوليسيا قىزمەتكەرىنە شابۋىل جاساعاندار سوتتالدى
ايىپتالۋشىلار پوليسيا قىزمەتكەرىنە پىشاق جاراقاتىن دا سالعان. تەرگەۋ قورىتىندىسى بويىنشا ەكى قاتىسۋشى دا ۇستالىپ، قازاقستان رەسپۋبليكاسى قىلمىستىق كودەكسىنىڭ 293-بابى 3-بولىگىمەن (بۇزاقىلىق) جانە 380-بابى 3-بولىگىمەن (بيلىك وكىلىنە قاتىستى كۇش قولدانۋ) قىلمىستىق جاۋاپتىلىققا تارتىلدى. سوت كۇزەتشىنى 5 جىلعا، ەكىنشى قاتىسۋشىنى 1 جىل 6 ايعا سوتتادى.
انانىڭ اق ءسۇتى
ەندى بانكتە ساقتالادى. الماتىدا جاڭا تۋعان نارەستەلەرگە ارنالعان ەمشەك ءسۇتى بانكى اشىلدى.
ەمشەك ءسۇتىن ساۋۋ مەيىرگەردىڭ باقىلاۋىمەن مىندەتتى تاڭبالانۋى بار ستەريلدى جەكە ىدىستاردا (ساۋۋ كۇنى مەن ۋاقىتى) جۇزەگە اسىرىلادى. جەكە جانە كلينيكالىق ەمشەك سورعىلارىن پايدالانۋعا رۇقسات ەتىلەدى. بارلىق ءىس-شارالار سانيتاريالىق-گيگيەنالىق نورمالاردى ساقتاي وتىرىپ جۇرگىزىلەدى. بانك ستەريلدى ىدىستارعا جينالعان جانە ەمشەك سۇتىمەن قورەكتەندىرۋ مۇمكىن بولماعان كەزدە بالانى تاماقتاندىرۋ ءۇشىن تومەن تەمپەراتۋرادا ساقتالاتىن ساۋىلعان ءسۇت قورى بولىپ تابىلادى. مۇندا سالقىنداتىلعان (4 ± 2 °C تەمپەراتۋرادا ساقتالعان) جانە مۇزداتىلعان (-18...-20 °C تەمپەراتۋرادا) ساۋىلعان تابيعي (شيكى) ءسۇتتى ساقتاۋعا بولادى.
جاسىل جەلەك جايقالسىن دەسەك
20 ساۋىردەن باستاپ الماتىدا جاسىل جەلەكتەردى بيولوگيالىق وڭدەۋ ماۋسىمى باستالادى. ءىس-شارالار اعاشتاردىڭ جاعدايىن جاقسارتۋ، ولاردىڭ زيانكەستەرگە توزىمدىلىگىن ارتتىرۋ جانە قالادا ەكولوگيالىق تەپە-تەڭدىكتى ساقتاۋ ماقساتىندا وتكىزىلەدى. جۇمىس تۇندە جۇزەگە اسىرىلادى: تىكەلەي كۇن ساۋلەسىنىڭ بولماۋى باياۋ بۋلانۋ ارقىلى زيانكەستەرگە قارسى قۇرالداردىڭ ۇزاق اسەر ەتۋىنە ىقپال ەتەدى.
وڭدەۋ جۇمىستارى ءتورت كەزەڭدە ورىندالادى:
• I كەزەڭ: 20 ساۋىردەن 30 مامىرعا دەيىن-بىرىنشى وڭدەۋ (ءتورت رەت ەمەن جانە ەكى رەت تەرەك وڭدەۋدى قوسقاندا)؛
• II كەزەڭ: 1 ماۋسىمنان 30 ماۋسىمعا دەيىن-ەكىنشى وڭدەۋ؛
• III كەزەڭ: 5 شىلدەدەن 5 تامىزعا دەيىن-ۇشىنشى وڭدەۋ؛
• IV كەزەڭ: 15 تامىزدان 20 قىركۇيەككە دەيىن-تورتىنشى وڭدەۋ.
مارافون كۇنى قوعامدىق كولىك قوزعالىسى وزگەرەدى
20 ءساۋىر كۇنى الماتىدا جارتىلاي مارافون قاشىقتىعى وتەتىن جول ۋچاسكەلەرىندە كولىك قوزعالىسى ءىشىنارا شەكتەلەدى. وسىعان بايلانىستى قالالىق موبيلدىلىك باسقارماسى قوعامدىق كولىك باعىتتارىنا ۋاقىتشا وزگەرىستەر ەنگىزىلەتىنىن حابارلايدى. ءار باعىت بويىنشا ۋاقىتشا قوزعالىس سىزباسىمەن @AlmatyJoly Telegram-ارناسىندا كەلەسى سىلتەمە ارقىلى تانىسۋعا بولادى: https://t.me/AlmatyJoly/1593
الماتى مارافونىنا 10 مىڭ ادام قاتىسادى
قالادا وتەتىن سەگىزىنشى جارتىلاي مارافون اياسىندا ءداستۇرلى قاشىقتىق قامتىلادى: 21،1 كم (جارتىلاي مارافون)، 10 كم، 10 كم (سكانديناۆيالىق ءجۇرىس) جانە كوماندالىق ەستافەتا. 20 ءساۋىر كۇنى ساعات 07:00-دەن 11:00-گە دەيىن مارافون باعىتى وتەتىن جول ۋچاسكەلەرىندە كولىك قوزعالىسى ءىشىنارا شەكتەلەدى. جارىس تاڭعى 07:00-دە تۇڭعىش پرەزيدەنت ساياباعىنان باستالادى.
زاڭسىز ساۋدا نىساندارىمەن كۇرەس كۇشەيتىلەدى
الماتىدا 1 مامىرعا دەيىن سوزىلاتىن زاڭسىز ورناتىلعان ساۋدا نىساندارىن بولشەكتەۋ بويىنشا اۋقىمدى اكسيا باستالدى. ناۋقان الماتى اكىمى ەربولات دوسايەۆتىڭ تاپسىرماسى بويىنشا «تازا قازاقستان» جالپى رەسپۋبليكالىق باعدارلاماسى جانە «الماتى – ءبىزدىڭ ورتاق ءۇيىمىز» قالالىق باستاماسى اياسىندا جۇزەگە اسىرىلۋدا.
الماتىدا جاڭا دوستىق ءۇيى سالىنادى
بيىل قازاقستان حالقى اسسامبلەياسىنىڭ قۇرىلعانىنا 30 جىل تولىپ وتىر — بۇل قوعامدىق ينستيتۋت مەملەكەت باسشىسىنىڭ جارلىعىمەن قۇرىلعان. ءدال وسى الماتىدا اسسامبلەيانى قۇرۋ تۋرالى شەشىم قابىلدانىپ، قازاقستاندىق ۇلتارالىق كەلىسىم ۇلگىسىنىڭ نەگىزگى قاعيداتتارى قالىپتاستىرىلدى. بۇدان كەيىنگى دامۋدىڭ ماڭىزدى باعىتى – ەتنومادەني بىرلەستىكتەرگە ارنالعان زاماناۋي ينفراقۇرىلىمدى قالىپتاستىرۋ بولماق. وسى رەتتە الماتى قالاسىنىڭ اكىمى ەربولات دوسايەۆ شاھاردا جاڭا دوستىق ءۇيىن سالۋ جوسپارى بار ەكەنىن مالىمدەدى.
جولاقىنى QR ارقىلى تولەۋگە بولادى
الماتى مەتروپوليتەنىندە قالالىق قوعامدىق كولىك قىزمەتىنىڭ ساپاسىن ارتتىرۋ ماقساتىندا 16 ساۋىردەن باستاپ پيلوتتىق رەجيمدە جولاقى تولەۋدىڭ جاڭا ءتاسىلى ەنگىزىلەدى. بۇل بالامالى تولەم ءتاسىلى جولاۋشىلارعا ينتەرنەت جەلىسىنە قوسىلماي-اق QR-كود ارقىلى جولاقى تولەۋگە مۇمكىندىك بەرەدى.
جاڭا ءتاسىل بويىنشا جولاقىنى تولەۋ ءۇشىن:
1. ONAY! قولدانباسىن تەلەفوندا اشىڭىز.
2. نەگىزگى بەتتىڭ تومەنگى جاعىندا QR تۇيمەنىباسىڭىز.
3. «QR كودتى جاساۋ» تاڭداڭىز-ول بايلانىس بولماعان كەزدە دە جاسالادى.
4. QR كودتى تۋرنيكەتتەگى كامەراعا كورسەتىڭىز.
5. جۇيە بالانستى تەكسەرەدى، تۋرنيكەت اشىلادى.
اسپاندا ايالداپ قالعان
اتتراكسيوننىڭ توقتاۋىنا قاۋىپسىزدىك داچيگىنىڭ ىسكە قوسىلۋى سەبەپ بولعان. الماتى قالالىق پوليسيا دەپارتامەنتى ساياباقتاردىڭ بىرىندە دەمالۋشىلار مىنگەن اتكەنشەكتىڭ كەنەتتەن توقتاپ قالۋىنا بايلانىستى تەرگەۋدى باستادى. كارۋسەلدەگى بارلىق ادام سەگىز مينۋت ىشىندە امان-ەسەن تومەنگە ءتۇسىرىلدى. وقيعادان ەشكىم زارداپ شەككەن جوق.
چەمپيوندى قۇتتىقتاۋ
الماتى اكىمدىگى مانەرلەپ سىرعاناۋشى ميحايل شايدوروۆتى الەم چەمپيوناتىندا كۇمىس مەدال جەڭىپ الۋىمەن قۇتتىقتادى. كەزدەسۋ بارىسىندا بەيبىت شاحانوۆ الماتى اكىمدىگىنىڭ اتىنان ميحايل شايدوروۆقا 2،5 ميلليون تەڭگە كولەمىندە قارجىلاي سەرتيفيكات تابىستاپ، ونىڭ وتاندىق سپورتتى دامىتۋعا جانە قالانى حالىقارالىق دەڭگەيدە تانىتۋعا قوسقان زور ۇلەسىن ەرەكشە ايتتى.