الماتىنىڭ سەگىز كوشەسىندە جاسىل بۋفەرلىك ايماقتار پايدا بولادى
المالى اۋدانىندا بىردەن سەگىز كوشەدە بۋفەرلىك ايماقتاردى اۋقىمدى كوگالداندىرۋ جۇمىستارى باستالدى، - دەپ حابارلايدى Aqshamnews.kz.
بۋفەرلىك ايماق – بۇل جول، تروتۋار نەمەسە تۇرعىن ۇيلەر مەن شۋلى نىساندار اراسىنداعى كەڭىستىك. جاسىل جەلەكتى وتىرعىزۋ شۋدىڭ دەڭگەيىن تومەندەتىپ، شاڭدى ۇستاپ قالۋعا، اۋانى تازارتۋعا، قالالىق ورتانى تۇرعىندار ءۇشىن جايلى ەتۋگە سەپتىگىن تيگىزەدى.
جول جيەگىن كوگالداندىرۋ جوسپارىنا ناۋرىزباي باتىر، شيەۆچەنكو جانە قۇرمانعازى كوشەلەرىنىڭ جەكەلەگەن اۋماقتارى كىردى. جەلتوقسان، ابىلاي حان داڭعىلى، نازاربايەۆ جانە سەيفۋللين سىندى قالعان ءتورت كوشەدە اباتتاندىرۋ جۇمىستارى اۋدان اۋماعىنداعى بۇكىل ۇزىندىق بويىمەن جۇرگىزىلەدى. سونداي-اق، جوسپارعا اباي داڭعىلىنىڭ ءبىر بولىگى دە (نازاربايەۆ داڭعىلىنان ەسەنتاي وزەنىنە دەيىن) ەندى. بارلىعى 60 مىڭنان استام بۇتا وتىرعىزىلادى.
كەيبىر ۋچاسكەدە – شيەۆچەنكو، قۇرمانعازى جانە ناۋرىزباي باتىر كوشەلەرىندە اباتتاندىرۋ جۇمىستارى اياقتالدى. تامىز ايىندا اباي، ابىلاي حان داڭعىلى مەن جەلتوقسان كوشەسىندە جۇمىس باستالىپ، 16 مىڭنان استام بۇتا وتىرعىزىلدى. جوبانى قازان ايىنىڭ سوڭىنا دەيىن اياقتاۋ جوسپارلانعان.
كوگالداندىرۋ ءۇشىن كوپىرشىك، سۇر توبىلعى، اق ءسانتال، كوكجالبىز سىندى قالا جاعدايىنا ءتوزىمدى وسىمدىكتەر تاڭدالدى. اسىرەسە، كۇتىمدى قاجەت ەتپەيتىن ءارى الماتىلىقتاردىڭ سۇيىكتى گ ۇلى رۋگوزا راۋشانىنا ءمان بەرىلىپ وتىر.
اباتتاندىرىلعان ۋچاسكەلەردە اۆتوماتتى سۋارۋ جۇيەسى ىسكە قوسىلدى. جاڭا جاسىل ايماقتار اۋداندى كوركەيتىپ، اۋانى تازارتىپ، كوشەلەردىڭ تىنىش ءارى جايلى بولۋىنا ىقپال ەتەدى.