“قۇقىقتىق ءتارتىپ” جەدەل الدىن الۋ ءىس-شاراسى اياسىندا الماتى قالاسىنىڭ پوليسياسى جولاۋشىلار تاسىمالىن تەكسەرىپ جاتىر.
تەكسەرۋ رەسمي تاسىمالداۋشىلاردىڭ اۆتوبۋستارىن عانا ەمەس، سونداي-اق جەكە تاسىمالداۋشىلاردى، سونىڭ ىشىندە قالاارالىق جانە وبلىسارالىق باعىتتارداعى كولىكتەردى دە قامتيدى، - دەپ حابارلايدى Aqshamnews.kz.
— جولاۋشىلاردى تاسىمالداۋ ەرەجەلەرىنىڭ بۇزىلۋىن، ءتيىستى رۇقساتسىز كولىكتى قايتا جابدىقتاۋدى، مىندەتتى مەملەكەتتىك تەحنيكالىق بايقاۋدان وتپەگەن كولىكتەردى پايدالانۋدى، جولاۋشىلاردىڭ قاۋىپسىزدىگىن قامتاماسىز ەتۋ تالاپتارىنىڭ ساقتالماۋىن انىقتاۋعا ەرەكشە كوڭىل بولىنۋدە. تەك جارتى كۇننىڭ ىشىندە 500-دەن استام قۇقىق بۇزۋشىلىق تىركەلدى. قالاارالىق تۇراقتى رەيستەردى ورىنداعان 15 شەتەلدىك تىركەۋدەگى كولىك جەلىدەن الىنىپ، ارنايى ايىپپۇل تۇراعىنا قويىلدى. ءبىزدىڭ باستى ماقساتىمىز – تەك قۇقىق بۇزۋشىلىقتاردى تىركەۋ ەمەس، قايعىلى جاعدايلاردىڭ الدىن الۋ. ءبىز كولىك قۇرالدارىنىڭ تەحنيكالىق جاي-كۇيىنە، جۇرگىزۋشىلەردىڭ رەيس الدىنداعى مەديسينالىق تەكسەرۋلەرىنە جانە جولاۋشىلاردى تاسىمالداۋ تالاپتارىنىڭ ورىندالۋىنا باقىلاۋدى كۇشەيتتىك، – دەدى الماتى قالاسى پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
پوليسيانىڭ مالىمەتىنشە، جولاۋشىلار تاسىمالىنىڭ قاۋىپسىزدىگى – قۇقىقتىق ءتارتىپتىڭ نەگىزگى ەلەمەنتى. جول-كولىك وقيعالارىنىڭ الدىن الۋ مەن ادام ءومىرىن ساقتاۋ – پوليسيا، تاسىمالداۋشىلار مەن ازاماتتاردىڭ بىرلەسكەن كۇش-جىگەرىمەن عانا مۇمكىن بولادى.