الاتاۋ اۋدانى اكىمدىگىندە مەملەكەتتىك ورگانداردىڭ وكىلدەرى مەن كاسىپكەرلەر قاتىسقان كەڭەس ءوتتى. كەزدەسۋدىڭ نەگىزگى تاقىرىبى زياندى شىعارىندىلار دەڭگەيىن تومەندەتۋ جانە اتموسفەرالىق اۋانى قورعاۋ سالاسىنداعى جاڭا تالاپتاردى ءتۇسىندىرۋ بولدى.
الاتاۋ اۋدانىنىڭ اكىمى دانيار قىرىقبايەۆتىڭ ايتۋىنشا، كەزدەسۋدىڭ باستى ماقساتى - جاڭا نورمالاردى تالقىلاۋ جانە اشىق ديالوگ اياسىندا بيزنەسپەن بىرلەسكەن جۇمىستى جولعا قويۋ.
مامانداردىڭ دەرەگىنشە، الاتاۋ اۋدانىندا قوعامدىق تاماقتانۋ ورىندارى، مونشالار مەن تەحنيكالىق قىزمەت كورسەتۋ بەكەتتەرى سەكىلدى 400-دەن استام كاسىپورىن جىل سايىن شامامەن 200 تونناعا جۋىق لاستاۋشى زاتتاردى اۋاعا بولەدى.
الماتى قالاسى ەكولوگيا جانە قورشاعان ورتا باسقارماسىنىڭ باسشىسى سەرىك ادىلبايەۆ اۋدان اۋماعىندا 400-دەن استام رەيدتىك ءىس-شارا وتكىزىلگەنىن، ونىڭ بارىسىندا كاۋاپحانالار مەن مونشالار تەكسەرىلگەنىن ايتتى. سونداي-اق، ول كەيبىر تۇرعىن ۇيلەردە ءالى كۇنگە دەيىن جىلىتۋ ءۇشىن قاتتى وتىن مەن كومىر پايدالانىلاتىنىن، بۇل اۋانىڭ لاستانۋىنا سەبەپ بولىپ وتىرعانىن ەسكە سالدى.
كەزدەسۋ قاتىسۋشىلارىنا الماتىدا 2025 جىلى 30 جەلتوقساندا بەكىتىلگەن اتموسفەرالىق اۋانى قورعاۋدىڭ جاڭا ەرەجەلەرى ءتۇسىندىرىلدى. اتالعان قۇجات قالا اۋماعىندا قاتتى جانە سۇيىق وتىندى پايدالانۋعا تىيىم سالادى جانە كاسىپكەرلەردى ارنايى سۇزگى قوندىرعىلارىن ورناتۋعا مىندەتتەيدى. بۇل تالاپتار 2027 جىلدان باستاپ مىندەتتى تۇردە ەنگىزىلەدى. وسىلايشا، الماتى قازاقستاندا اتموسفەرالىق اۋانى قورعاۋدا كەشەندى ءتاسىل العاش ەنگىزگەن قالا اتاندى.
«تالاپتارعا سايكەس، شىعارىندىلارى تومەن ايماقتاردا ورنالاسقان نىساندار ەكولوگيالىق تازا وتىن تۇرىنە كوشۋگە ءتيىس. اتموسفەراعا شىعارىندىلار كولەمىن ازايتۋ ءۇشىن ەرەجەلەرگە ساي قاتتى وتىندى – كومىر مەن وتىندى، سونداي-اق سۇيىق وتىندى پايدالانۋعا تىيىم سالىنادى. ەكولوگيالىق تازا وتىنعا، ياعني گازعا كوشۋ قاجەت. سونىمەن قاتار ارنايى سۇزگى قوندىرعىلارىن ورناتۋ تالاپتارى بار. ايتا كەتۋ كەرەك، بۇل تالاپتار كەيىنگە قالدىرىلعان كەزەڭدى قامتيدى، ياعني كاسىپكەرلىك نىساندارى ءۇشىن ولار 2027 جىلدان باستاپ كۇشىنە ەنەدى»، – دەپ ءتۇسىندىردى «Eco Almaty» ج ش س باس ديرەكتورى ميراس گايسين.
ونىڭ ايتۋىنشا، جاڭا تالاپتار ەكولوگيالىق كودەكس پەن سانيتاريالىق-ەپيدەميولوگيالىق ەرەجەلەردىڭ قولدانىستاعى نورمالارىنا نەگىزدەلگەن جانە قالاداعى اۋا ساپاسىن كەزەڭ-كەزەڭىمەن جاقسارتۋعا باعىتتالعان.
كەزدەسۋگە قاتىسۋشىلار مەملەكەتتىك ورگاندار مەن بيزنەس وكىلدەرىنىڭ بىرلەسكەن جۇمىسى عانا اۋانىڭ لاستانۋ دەڭگەيىن تومەندەتىپ، الماتىداعى ەكولوگيالىق احۋالدى بىرتىندەپ جاقسارتۋعا مۇمكىندىك بەرەتىنىن اتادى.