الماتىدا سۋعا تۇسەتىن ماۋسىمنىڭ الدىندا سۋ قويمالارىنداعى قاۋىپسىزدىك جاعى كۇشەيتىلدى
سۋعا شومىلاتىن ماۋسىم كەزىندەگى قاۋىپسىزدىكتى كۇشەيتۋ ماقساتىندا الماتىدا «مامىر ءقاۋپى» دەگەن اتپەن كەشەندى ءىس-شارالار جاسالىپ، بەكىتىلدى. الماتىنىڭ وڭىرلىك كوممۋنيكاسيالار قىزمەتىندە وتكەن پرەسس-كونفەرەنسيادا وسى تۋرالى ايتىلدى، دەپ حابارلايدى aqshamnews.kz
تجد اقپاراتىنا قاراعاندا، الماتىنىڭ اۋماعى مەن تاۋعا جاقىن جەرلەردە ورنالاسقان 44 سۋ قويماسىنىڭ 9-ى سۋعا تۇسۋگە ءقاۋىپتى.
1. شاڭىراق پەن دارحان ىقشاماۋدانىنداعى ۇلكەن الماتى وزەنى – الاتاۋ اۋدانى؛
2. دارحان ىقشاماۋدانىنداعى ۇلكەن الماتى وزەنى – الاتاۋ اۋدانى؛
3. ءال-فارابي مەن ناۆوي جاقتاعى ۇلكەن الماتى وزەنى - بوستاندىق اۋدانى؛
4. كەمەل ىقشاماۋدانىنداعى پەرۆومايسكيە پرۋدى – جەتىسۋ اۋدانى؛
5. كىشى الماتى وزەنى (بۋتاكوۆكاعا بۇرىلا بەرگەندە) – مەدەۋ اۋدانى؛
6. يۋنناتسكوە وزەنى – مەدەۋ اۋدانى؛
7. قاراسۋ ىقشاماۋدانىنداعى توعان - الاتاۋ اۋدانى؛
8. اەروپورتوۆسكوە وزەنى – تۇركسىب اۋدانى؛
9. قاراسۋ جاقتاعى وزەن (شەستۋحا) – تۇركسىب اۋدانى.
«ءتورت جەردە – سايران كولىنىڭ باتىس جانە شىعىس جاعىندا، «گۇلدەر» دەمالىس ورنى مەن «باۋم» باعىنىڭ اۋماعىنداعى جاعاجايدا عانا سۋعا تۇسۋگە رۇقسات. ءبىراق ءقازىر بۇل سۋ قويمالارى سۋعا تولا قويماعان. سايران كولىندە بىلتىردان بەرى جاعالاۋدى اباتتاندىرۋ جۇمىستارى ءجۇرىپ جاتىر. د. قونايەۆ اتىنداعى ۇاو-دە گيدروتەحنيكالىق قۇرىلىمدار كۇردەلى جوندەۋدەن ءوتىپ جاتىر»،- دەپ حابارلادى، الماتى قالاسى تجد ازاماتتىق قورعانىس باسقارماسىنىڭ باستىعى قۋانىش وسپانوۆ.
سۋداعى قاۋىپسىزدىكتى كۇشەيتۋ ءۇشىن، دەپارتامەنت ءقازىر پوليسيا قىزمەتكەرلەرىنىڭ، قۇتقارۋشىلار مەن ەرىكتىلەردىڭ باسىن قوسىپ، رەيد جاساپ جاتىر. بىلتىر سۋعا ءتۇسۋدىڭ ادەب-ەرەجەسىن ورەسكەل بۇزعان 40 ادام اكىمشىلىك جاۋاپقا تارتىلدى.
سونىمەن بىرگە، بىلتىردان بەرى ءقاۋىپتى سۋ قويمالارىنا ينتەللەكتۋالدى كامەرالار قويىلىپ، ولاردى تجد-نىڭ ارناۋلى كومپيۋتەرلەرى مەن سۋداعى قۇتقارۋ قىزمەتىنىڭ ماماندارى باقىلاپ وتىراتىن بولدى. كامەراداعى بەينەلەردى تجد قىزمەتكەرلەرى سمارتفوننان دا كورىپ وتىرادى.
«ءبىز وسىعان وراي تۇرعىنداردى قۇلاقتاندىرىپ، جۇمىس ىستەپ جاتىرمىز. ادام كوپ جۇرەتىن ءبىلىم بەرۋ، دەنساۋلىق ساقتاۋ مەكەمەلەرىندە، جولدىڭ بويىندا تۇرعان لەد ەكرانداردان بەينەروليك كورسەتۋدى دە قولعا الدىق،- دەپ تولىقتىردى تجد وكىلى.
وقىس وقيعا بولماس ءۇشىن، قۇتقارۋشىلار سۋعا تۇسكەن كەزدە اسا ساق بولۋعا شاقىردى تۇرعىنداردى.
- سۋدىڭ جاعاسىندا بالالاردى قاراۋسىز قالدىرماڭىز؛
- جۇزە الماساڭىز، سۋعا تەرەڭدەپ بويلاماڭىز؛
- سۋعا تۇسكەندە بىر-بىرىڭىزدەن كوز جازىپ قالماڭىز؛
- ارناۋلى بەلگى قويىلعان جەردەن الىسقا ۇزاماڭىز؛
- كوپىردەن، جاعادان، قايىقتان سۋعا سەكىرمەڭىز؛
- تۇندە دە سۋعا تۇسپەڭىز.