قار تازالاۋعا كوممۋنالدىق قىزمەتتەر 600 تەحنيكا مەن 1000 جۇمىسشىنى جۇمىلدىردى
15 جەلتوقسان كەشىنەن باستاپ الماتىنى قارلى بوران باسىپ قالدى. 16 جەلتوقسان ساعات 9:00-گە دەيىن قالادا قاردىڭ قالىڭدىعى 22 سم-گە جەتتى، كامەنسكوە پلاتوسىندا — 40 سم، ال شىمبۇلاقتا — 42 سم. تاۋلىگىنە جەلتوقسان ايىنىڭ ايلىق نورماسىنىڭ 32%-ى جاۋدى. جالپى العاندا، جەلتوقساننىڭ وسى كەزەڭىنە قاراي ايلىق نورمانىڭ 73%-ى تۇسكەن.
الماتى قالاسىنىڭ كوممۋنالدىق ينفراقۇرىلىمدى دامىتۋ باسقارماسىنىڭ مالىمەتىنشە، قاردىڭ سالدارىمەن كۇرەسۋ ءۇشىن كوممۋنالدىق قىزمەتتەر تولىقتاي جۇمىلدىرىلدى. قالا كوشەلەرىندە كۇن بويى 605 ارنايى تەحنيكا مەن 1080 جول جۇمىسشىسى ەڭبەك ەتەدى. قار جاۋا باستاعان ساتتەن باستاپ كوكتايعاقتىڭ الدىن الۋ ءۇشىن 122 قۇم شاشاتىن تەحنيكا جولداردى وڭدەپ، 2065 تونناعا جۋىق رەاگەنت قولداندى.
16 جەلتوقسان تاڭعى ساعات ەرتە باستالعاننان جول قىزمەتتەرى كوشەلەردى قايتا تازارتا باستادى. 23 تەحنيكا كولونناسى جۇمىس ىستەپ، ولاردى پوليسيانىڭ پاترۋلدىك ماشينالارى سۇيەمەلدەپ ءجۇر.
رەسپۋبليكا الاڭى، اۋەجاي جانە الماتى-1 مەن الماتى-2 تەمىرجول ۆوكزالدارى سياقتى نەگىزگى قالالىق نىسانداردان قاردى شىعارۋ جۇمىستارى ۇيىمداستىرىلدى. ءتۇن ىشىندە 850 م³ قار شىعارىلسا، ساعات 11:00-گە قاراي بۇل كولەم 1200 م³-گە جەتتى.
جاياۋ جۇرگىنشىلەر جولدارى، اۆتوتۇراق ايماقتارى جانە الەۋمەتتىك ماڭىزى بار نىسانداردىڭ كىرەبەرىستەرىن تازالاۋ ءۇشىن 65 شاعىن تەحنيكا تارتىلعان. قوعامدىق كولىك ايالدامالارىن، جاياۋ جۇرگىنشىلەر وتكەلدەرىن، باسپالداقتار مەن پاندۋستاردى قولمەن تازارتۋ جۇمىستارى دا جۇرگىزىلۋدە.
الماتى قالاسىنىڭ كوممۋنالدىق ينفراقۇرىلىمدى دامىتۋ باسقارماسى جۇرگىزۋشىلەردەن مىنا تالاپتاردى ساقتاۋدى سۇرايدى:
- كولىك جىلدامدىعى مەن ارا قاشىقتىققا مۇقيات بولۋ؛
- جول جيەگىندە كولىكتى توقتاتپاۋ، سەبەبى بۇل قار تازالاۋشى تەحنيكانىڭ جۇمىسىنا كەدەرگى كەلتىرەدى.
جاياۋ جۇرگىنشىلەرگە جولدان وتكەن كەزدە ساق بولۋ ۇسىنىلادى.